విజయవాడ, అక్టోబర్ 12: రాష్ట్రంలోని వివిధ జిల్లాల కలెక్టర్లతో సదస్సును ఈ నెల 24, 25 తేదీల్లో ప్రభుత్వం నిర్వహించనుంది. ఉండవల్లిలోని గ్రీవెన్స్ హాల్‌లో ఈ సదస్సు నిర్వహిస్తారు. వివిధ పథకాల అమలు తీరుపై ముఖ్యమంత్రి చంద్రబాబు నాయుడు సమీక్ష చేసి, అధికారులకు దిశానిర్దేశం చేస్తారు. ఇకపై ప్రతినెలా జిల్లా కలెక్టర్లతో సదస్సులు నిర్వహించాలని ఇప్పటికే సీఎం నిర్ణయించారు.

న్యూఢిల్లీ, అక్టోబర్ 12: ఆంధ్రప్రదేశ్ హక్కుల కోసం కేంద్రాన్ని నిలదీసినందుకే బీజేపీ ప్రభుత్వం తనపై కుట్ర పూరితంగా ఆదాయపన్ను శాఖ(ఐటీ) దాడులు చేయిస్తోందని టీడీపీ రాజ్యసభ సభ్యుడు సీఎం రమేశ్ ఆరోపించారు. హైదరాబాద్, కడప నగరాల్లో రమేశ్ నివాసాలు, కార్యాలయాల్లో శుక్రవారం ఐటీ శాఖ అధికారులు విస్తృత సోదాలు జరిపారు.

విజయవాడ, అక్టోబర్ 12: శ్రీకాకుళం, విజయనగరం జిల్లాల్లో చాలా ప్రాంతాల్లో విద్యుత్ సరఫరా నిలిచిపోవడంతో మంచినీటి సరఫరా పథకాలు పనిచేసేందుకు వీలుగా 16 భారీ జనరేటర్లను అక్కడికి తరలించారు. రాష్ట్ర ఐటీ శాఖ మంత్రి నారా లోకేష్ ఆదేశాల మేరకు అధికారులు ఈ ఏర్పాట్లు చేశారు. తిత్లీ తుపాను ప్రభావిత రెండు జిల్లాల్లో సహాయక చర్యలపై ఢిల్లీ నుంచి మంత్రి శుక్రవారం సమీక్షించారు.

శ్రీకాకుళం, అక్టోబర్ 11: పెను తుపాను తిత్లీ శ్రీకాకుళం జిల్లాపై విరుచుకుపడింది. జిల్లాలోని వజ్రపుకొత్తూరు మండలం గొల్లపాడు, పల్లిసారధి మధ్య గురువారం తెల్లవారుజామున తీరాన్ని తాకి, గంటకు 160 కిలోమీటర్ల వేగంతో కదులుతున్న తుపాను పెనుగాలులతో సిక్కోల్‌ను అతలాకుతలం చేసింది. ప్రచండ వేగంతో గాలులు విరుచుకుపడడంతో ఉద్దానంపై మరోసారి ప్రకృతి కరాళనృత్యం చేసింది.