న్యూఢిల్లీ, ఆగస్టు 12: దివాలా ప్రక్రియ స్మృతి (ఐబీసీ) వల్ల రుణాల వసూళ్ల వేగం పెరిగిందని, దీని వల్ల బ్యాంకుల ఆర్థిక స్థితి మెరుగుపడిందని ఫీక్కీ అనే వాణిజ్య సంస్ధ పేర్కొంది. ఈ స్మృతి అమలులోకి వచ్చిన తర్వాత బకాయిపడిన పారిశ్రామిక వర్గాలకు చెందిన ప్రమోటర్లు బకాయిలు చెల్లించేందుకు ముందుకు వస్తున్నారని బ్యాంకర్లు చెబుతున్నారని ఫిక్కీ పేర్కొంది.

హైదరాబాద్, ఆగస్టు 12:కొత్త పాదరక్షల డిజైన్లతో ఏరోబ్లూ మార్కెట్‌లోకి వస్తోంది. యామి గౌతమి బ్రాండ్ అంబాసిడర్‌గా నియమించుకున్న ఏరోబ్లూ సరికొత్త డిజైన్లతో మార్కెట్‌ను పెంచుకోనుందని సంస్థ కంట్రీ హెడ్ జ్యోతి కృష్ణ చెప్పారు. సంస్థను 1996లో సూరత్‌లో ప్రారంభించామని, యుఎఈ కేంద్రంగా పనిచేస్తున్న అదానీ సోదరుల సహకారంతో పాదరక్షల ఉత్పత్తి రంగంలో రాణిస్తున్నామని అన్నారు.

వాషింగ్టన్, ఆగస్టు 11: మైక్రోసాఫ్ట్ సీఈవో, భారత సంతతికి చెందిన నాదెళ్ల సత్య మైక్రోసాఫ్ట్ కంపెనీలో తనకు ఉన్న షేర్లలో మూడో వంతు షేర్లను విక్రయించి దాదాపు 35 మిలియన్ డాలర్లను ఆర్జించారు. నాదెళ్ల 328000 షేర్లను అమెరికా డాలర్‌లో 109.08 చొప్పున విక్రయించారు. ఈ వివరాలతో రెగ్యులేటరీ ఫైలింగ్ కూడా చేశారు. దీని వల్ల 35 మిలియన్ డాలర్ల ఆదాయం సత్య నాదెళ్ల ఖాతాలో చేరింది.

న్యూఢిల్లీ, ఆగస్టు 11: కోల్ ఇండియా లిమిటెడ్ ఈ ఏడాది తొలి త్రైమాసిక కాలంలో 61.07 శాతం వృద్ధిరేటుతో రూ. 3786.44 కోట్ల నికర ఆదాయాన్ని సాధించింది. ఈ వివరాలను కోల్ ఇండియా వెల్లడించింది. ఈ సంస్ధ గత ఏడాది ఇదే త్రైమాసిక కాలంలో రూ.2350.78 కోట్ల నికర లాభాలు సాధించింది. అదే విధంగా నికర ఆదాయం రూ.21,774.42 కోట్ల నుంచి రూ. 25,470.86 కోట్లకు పెరిగింది. నికర ఆదాయలో 17 శాతం వృద్ధిరేటునమోదైంది.