రాష్ట్ర విభజన సమయంలో ఎపికి ప్రత్యేక హోదా ఇస్తామని అప్పట్లో ప్రతిపక్ష పార్టీగా ఉన్న బిజెపి ప్రకటన చేసి ఇపుడు ద్వంద్వవైఖరి అవలంబిస్తోంది. ప్రత్యేకహోదా అయిదేళ్లు కాదు, పదేళ్లు ఇవ్వాలన్న ఆ పార్టీ అధికారంలోకి వచ్చాక మాట మార్చేసింది. ప్రత్యేక హోదా ఇవ్వాలంటూ ఆందోళనలు చేస్తున్న ప్రతిపక్షాలను విమర్శిస్తున్నది. వైకాపా, కాంగ్రెస్ వారు ఎందుకు చేస్తున్నారు?

హిందూ మతాన్ని బౌద్ధ మతం కబళించే స్థితిలో ఆదిశంకరాచార్యుల వారు ఉద్భవించి, ఆ మతాన్ని భారతదేశం నుండి తరిమికొట్టి మళ్లీ అది ప్రవేశించకుండా నాలుగు దిక్కులా పీఠాలను స్థాపించారు. బౌద్ధ మతానికి వేదాలతో పనిలేదని ఆయన భావించారు. ఈ కారణంగానే హిందూ మతం సుస్థిరంగా ఉండాలని పీఠాలను స్థాపించి భారతీయులను సమైక్యపరిచారు. ‘వేదం వేరు, హిందూ మతం వేరు’ అనడానికి ఎట్టి పరిస్థితుల్లోనూ వీలులేదు.

ఆసిఫాబాద్ జిల్లాకు కొమరం భీమ్, సిరిసిల్లకు రాజన్న , భూపాలపల్లికి జయశంకర్ పేరిట తెలంగాణలో కొత్త జిల్లాలు ఏర్పడ్డాయి. దేశదేశాల్లో కీర్తి గడించిన తెలుగుబిడ్డ, దివంగత మాజీ ప్రధాని పీవీ నరసింహారావును ప్రభుత్వం విస్మరించడం విచారకరం. ప్రధానిగా, నూతన ఆర్థిక విధానాల రూపకర్తగా, ముఖ్యమంత్రిగా, బహుభాషావేత్తగా కీర్తి శిఖరాలను అందుకున్న పీవీని గతంలో కాంగ్రెస్ పార్టీ విస్మరించింది.

ముంబయి పేలుళ్ల కేసులో నిందితుడు మసూద్ అజహర్‌ని ఉగ్రవాదిగా ప్రకటించి అతనిపై కఠిన చర్యలు తీసుకోవాలని ఐరాసలో భారత్ తీర్మానిస్తే చైనా మాత్రం ‘వీటో’ చేసింది. ఇప్పుడు అదే చైనాకు చెందిన అధికార ప్రతినిధి- సీమాంతర ఉగ్రవాదంపై ప్రపంచం గట్టిగా స్పందించాలని న్యూయార్క్ సదస్సులో గంభీర ఉపన్యాసం చేయడం విడ్డూరం. చైనా డ్రాగన్‌కి రెండు తలలు, రెండు నాలుకలు!