ఆక్లాండ్, మార్చి 22: న్యూజిలాండ్‌తో గురువారం మొదలైన మొదటి టెస్టు మ్యాచ్ తొలి ఇన్నింగ్స్‌లో ఇంగ్లాండ్ కేవలం 58 పరుగులకే కుప్పకూలింది. ట్రెంట్ బౌల్ట్ ఆరు వికెట్లు పడగొట్టి, ఇంగ్లాండ్‌ను దారుణంగా దెబ్బతీశాడు. టిమ్ సౌథీ నాలుగు వికెట్లతో రాణించి, న్యూజిలాండ్ ఆధిపత్యాన్ని కొనసాగించాడు.

ముంబయి, మార్చి 22: మూడు మ్యాచ్‌ల వనే్డ సిరీస్‌లో ఆస్ట్రేలియాను ఎదుర్కొని, 0-3 తేడాతో పరాజయాన్ని చవిచూసిన భారత మహిళల జట్టు టీ-20 ఫార్మాట్‌లోనూ పుంజుకోలేదని స్పష్టమైంది. ముక్కోణపు టీ-20 ఇంటర్నేషనల్ సిరీస్‌లో భాగంగా ఆసీస్‌ను ఢీకొన్న భారత్ ఆరు వికెట్ల తేడాతో పరాజయాన్ని చవిచూసింది. స్మృతి మందానా అర్ధ శతకంతో రాణించినప్పటికీ, ఆమె శ్రమ వృథా అయింది.

మియామీ, మార్చి 22: ప్రపంచ మాజీ నంబర్ వన్ సెరెనా విలియమ్స్ ఇక్కడ జరుగుతున్న మియామీ ఓపెన్ టెన్నిస్ టోర్నమెంట్ తొలి రౌండ్‌లోనే పరాజయాన్ని ఎదుర్కొంది. గత వారం ఇండియన్ వెల్స్ టైటిల్‌ను కైవసం చేసుకున్న జపాన్ క్రీడాకారిణి నవోమీ ఒసాకా 6-3, 6-2 తేడాతో సెరెనాపై సులభంగా గెలిచింది. గత ఏడాది సెప్టెంబర్‌లో ఆడ పిల్లకు జన్మనిచ్చిన ఆమె 13 నెలల విశ్రాంతి తర్వాత మళ్లీ కెరీర్‌ను మొదలు పెట్టింది.

కోల్‌కతా, మార్చి 22: భారత టేబుల్ టెన్నిస్ చాంపియన్ సౌమ్యజిత్ ఘోష్‌పై అత్యాచార కేసు నమోదైంది. అతను పెళ్లి చేసుకుంటానని తనను నమ్మించి, శారీరక సంబంధం పెట్టుకొని, ఇప్పుడు నిరాకరిస్తున్నాడని ఆరోపిస్తూ 18 ఏళ్ల యువత బారాసాత్ పోలీసు స్టేషన్‌లో ఫిర్యాదు చేసింది. 2014లో ఫేస్ బుక్ ద్వారా అతను పరిచయమయ్యాడని, ఆతర్వాత తనను ప్రేమిస్తున్నానని చెప్పాడని ఆ యువతి తన ఫిర్యాదులో పేర్కొంది.