హుజూరాబాద్, అక్టోబర్ 5: కరీంనగర్ జిల్లాలో హుజూరాబాద్ కేంద్రంగా పివి నరసింహారావు జిల్లాను ఏర్పాటు చేయాలని డిమాండ్ చేస్తూ జెఎసి నాయకులు బుధవారం ఆందోళనకు దిగారు. పట్టణంలోని అంబేద్కర్ కూడలి వద్ద జెఎసి ఆధ్వర్యంలో జరిగిన ఈ ఆందోళనకు జెఎసితో పాటు వివిధ పార్టీల నాయకులు పెద్ద ఎత్తున హాజరయ్యారు.

మహబూబ్‌నగర్, అక్టోబర్ 5: మహబూబ్‌నగర్ జిల్లాలో కొత్త జిల్లాలపై రగడ కొనసాగుతూనే ఉంది. నారాయణపేట జిల్లా ప్రకటించాలని అధికార పార్టీకి చెందిన ఎమ్మెల్యే రాజేందర్‌రెడ్డి ఏకంగా రాజీనామా చేస్తున్నట్లు ప్రకటించి తన రాజీనామా లేఖను ఫ్యాక్స్ ద్వారా కర్ణాటక నుండి రాష్ట్ర ప్రభుత్వానికి పంపించారు. దాంతో ఒక్కసారిగా నారాయణపేటలో 48 గంటల బంద్‌కు జనం శ్రీకారం చుట్టారు.

నాగార్జునసాగర్, అక్టోబర్ 5: గత రెండురోజులుగా నాగార్జునసాగర్ జలాశయానికి శ్రీశైలం నుండి వస్తున్న ఇన్‌ఫ్లో తగ్గుముఖం పట్టగా బుధవారం సాయంత్రం నుండి ఇన్‌ఫ్లో ప్రారంభమైంది. శ్రీశైలంలోని విద్యుత్ ఉత్పత్తి ద్వారా బుధవారం సాయంత్రం 40,685 క్యూసెక్కుల నీరు వచ్చి చేరుకుంటోంది. ప్రస్తుతం సాగర్ జలాశయంలో 590 అడుగులకుగాను 533 అడుగులుగా ఉంది. ఎడమకాల్వ ద్వారా మంగళవారం నుండి నీటి విడుదల కొనసాగిస్తున్నారు.

మెదక్, అక్టోబర్ 5: మెదక్ ఇందిరాగాంధీ స్టేడియంలో తెలంగాణ రాష్ట్ర జూనియర్ అంతర్ జిల్లాల 2016 ఫుట్‌బాల్ బాలుర చాంపియషన్‌షిప్ క్రీడలను రాష్ట్ర మత్య్సశాఖ మంత్రి తలసాని శ్రీనివాస్ యాదవ్ బుధవారం ప్రారంభించారు. ఈ సందర్భంగా ఆయన క్రీడా పతాకాన్ని ఆవిష్కరించారు. ఈ క్రీడలలో పాల్గొన్న 10 జిల్లాల బాలలు నిర్వహించిన మార్చ్ఫాస్ట్‌ను మంత్రి స్వీకరించారు.