హైదరాబాద్‌ : బంజారాహిల్స్‌ వెంకటేశ్వర ఆలయంలో ఏర్పాటు చేసిన గణపతిని నిర్వాహకులు నిమజ్జనం కోసం గురువారం తరలిస్తుండగా విగ్రహం కింద పడిపోయింది. ప్రత్యేక వాహనంలో విగ్రహం అమర్చడానికి ప్రయత్నిస్తున్న సమయంలో క్రేన్ హుక్కు ఊడిపోయింది. దీంతో విగ్రహం కింద పడిపోయింది. ఎవరికీ ప్రమాదం జరగకపోవడంతో అందరూ ఊపిరి పీల్చుకున్నారు.

కందుకూరు : రంగారెడ్డి జిల్లా కందుకూరు మండలం పోరడోని కుంటలో నలుగురు విద్యార్థులు గురువారం ఈతకు వెళ్లి నీటిలో మునిగి చనిపోయారు. ముగ్గురు విద్యార్ధుల మృతదేహాలను గ్రామస్థులు బయటకు తీశారు. మరొకరి కోసం గాలిస్తున్నారు. విద్యార్థులు మహ్మద్‌నగర్‌ గ్రామానికి చెందిన వారు.

హైదరాబాద్‌: రంగారెడ్డి జిల్లాలో బుధవారం సాయంత్రం నుంచి వర్షం కురుస్తూనే ఉంది. వికారాబాద్‌ మండలం రాళ్లచిట్టెంపల్లి-పిల్లారం మధ్య వాగు పొంగడంతో రెండు బైక్‌, కారు కొట్టుకుపోయాయి. ఈ ఘటనలో ఒకరు మృతిచెందగా, ఏడుగురు గల్లంతయ్యారు. కాగ్నా నదిపై వంతెన తెగడంతో తాండూరు-మహబూబ్‌నగర్‌ మధ్య రాకపోకలు నిలిచిపోయాయి.

హైదరాబాద్: ఖైరతాబాద్ మహాగణపతి నిమజ్జన ప్రక్రియ గురువారం మధ్యాహ్నం 1:50 గంటలకు పూర్తి అయ్యింది. మహాగణపతి ఈ ఉదయం శోభాయాత్రగా బయలుదేరి ట్యాంక్‌బండ్‌ క్రేన్ నెంబర్ 5 వద్ద నిమజ్జనం అయ్యాడు. చివరి పూజ అనంతరం ఆద్యాత్మిక వాతావరణంలో మహాగణపయ్య గంగఒడికి చేరుకున్నాడు.వర్షాన్ని సైతం లెక్క చేయకుండా మహాగణపతి నిమజ్జనానికి వేల సంఖ్యలో భక్తులు తరలివచ్చారు.