పెద్ద నోట్లను రద్దు చేస్తూ కేంద్ర ప్రభుత్వం ఈ నెల 8వ తేదీ రాత్రి 8 గంటల సమయంలో అకస్మాత్తుగా నిర్ణయం తీసుకోవడంతో సామాన్య ప్రజలు నానాపాట్లు పడుతున్నారు. వారి అగచాట్లు ప్రధాని నరేంద్ర మోదీకి పట్టవా? ప్రత్యామ్నాయ ఏర్పాట్లు పూర్తి చేశామంటూ చెప్పినా, ఇప్పటివరకు సామాన్య ప్రజలు బ్యాంకులు, పోస్ట్ఫాసుల వద్ద బారులుతీరి నిలుచుండాల్సిన పరిస్థితి ఎందుకు వచ్చింది? దీనిని ఎందుకు పట్టించుకోవడం లేదు?

దేశంలో పాత 500 రూపాయిలు, వెయ్యి రూపాయిల నోట్లను రద్దు చేస్తూ కేంద్ర ప్రభుత్వం నిర్ణయం తీసుకోవడం విప్లవాత్మకమైన చర్య, చారిత్రాత్మక సంఘటన. నల్లధనం దాచుకున్న వారికి, అవినీతిపరులకు, నకిలీ నోట్లు సరఫరా చేస్తున్న ఆర్థిక ఉగ్రవాదులకు ఇదొక సర్జికల్ స్ట్రైక్. ఈ చర్య ఎంతైనా ఆహ్వానించదగింది. ఇంతటి సాహసోపేతమైన నిర్ణయం తీసుకున్న ప్రధాని నరేంద్ర మోదీకి హృదయపూర్వక అభినందనలు.

అమెరికా, భారత్ రెండూ ప్రపంచంలోనే అతిపెద్ద, బలమైన ప్రజాస్వామ్య దేశాలు. ఈ రెండు దేశాల్లో ప్రజలు ఎన్నుకునే పార్టీలపై సర్వత్రా ఉత్కంఠత నెలకొని ఉంటుంది. అమెరికా ఎన్నికల్లో ఎవరుగెలుస్తారనే దానిపై భారత్‌తోసహా ప్రపంచ వ్యాప్తంగా ప్రజలు ఆసక్తిగా ఎదురుచూశాయ. ఈ ఎన్నికల్లో డెమొక్రటిక్ పార్టీ గెలిచుంటే ఆర్థిక రంగానికి సంబంధించి పాతవిధానాలే కొనసాగేవి.

అమెరికా అధ్యక్ష ఎన్నికల్లో గెలుపు ఎవరిదైనా మన దేశంతో సత్సంబంధాలు యధావిధిగా కొనసాగుతాయి. ఉద్యోగ, ఉపాధి అవకాశాలు పెరిగేలా సంబంధాలు పెంచుకోవాల్సిన అవసరం ఉంది. అందుకు అనుగుణంగా వీసాల మంజూరు విషయంలో ఉన్న నిబంధనలు చారావరకు సరళీకృతం చేయాల్సిన అవసరం ఉంది. ఇప్పుడున్న నిబంధనల ప్రకారం వీసాల మంజూరులో అనేక సాధకబాధకాలు ఎదురవుతున్నాయి.