నిజాం కాలంలో నిరంకుశపాలన సాగినరోజుల్లో, రజాకార్ల దౌర్జన్యాలను ఎదుర్కొనేందుకు వామపక్షాలు ప్రజాఉద్యమాన్ని తీసుకువచ్చాయి. నిజాంనిరంకుశపాలన నుండి ప్రజలను విముక్తుల్ని చేశాయి. ఇప్పుడు భూస్వాములు, వ్యాపారవేత్తలు, పారిశ్రామికవేత్తలు, రియల్‌ఎస్టేట్ వ్యాపారులు, కార్పోరేట్ సంస్థల యజమానులు ప్రభుత్వాన్ని నడిపిస్తున్నారు. పేద ప్రజలను దోచుకుంటున్నారు. ఈ దోపిడీని అరికట్టేందుకు మరో ప్రజాఉద్యమం రావలసి ఉంది.

చట్టసభలు ప్రజాసమస్యలను పరిష్కరించే కేంద్రాలుగాకంటే రాజకీయ పార్టీల బాహాబాహీకి వేదికగా మారాయి. ‘దురదృష్టవశాత్తు కాలంతోపాటు చట్టసభల పనితీరులో విలువలు పతనమవుతున్నాయని, దీనిని నియంత్రించకపోతే భవిష్యత్‌లో సభలు తమ ప్రాధాన్యం కోల్పోయే ప్రమాదం ఉంది’ అని ఆంధ్రప్రదేశ్ శాసనసభ స్పీకర్ కోడెల శివప్రసాదరావు ఒక సందర్భంలో అభిప్రాయపడ్డారు. ఈ భావన అందరిలోనూ ఉంది.

రాజకీయ పార్టీలు ద్వంద్వ ప్రమాణాలు అవలంబిస్తున్నాయి. పాలకపక్షంగా ఉన్నప్పుడు ఒక రకంగా, ప్రతిపక్షంలోకి వస్తే మరో రకంగా వ్యవహరిస్తున్నాయి. ప్రతిపక్షంలో ఉన్నప్పుడు సభను స్తంభింపజేయడంద్వారా ప్రజలను ఆకర్షించాలన్న తాపత్రయమే తప్ప ప్రజా సమస్యల పరిష్కారానికి ప్రభుత్వానికి సహకరించాలన్న తపన ఉండడం లేదు. ఇక ప్రాంతీయ పార్టీలు అధికారంలోకి వచ్చిన రాష్ట్రాల్లోని చట్టసభల్లో విలువలు పడిపోతున్నాయి.

ప్రజలకు నమ్మకం కలిగించే విధంగా చట్టసభలు పనిచేయాలి. సభ్యులంతా నీతి, నిజాయితీ, విలువలతో ఉంటూ తమ నియోజకవర్గాలే కాకుండా తమ ప్రాంతాలు, రాష్ట్రం అభివృద్ధికోసం అంకితమైన భావంతో పని చేయాలి. రాజ్యాంగం యొక్క స్పూర్తికి విఘాతం కలగకుండా చూసుకోవాలి. లోగడ వివిధ రాష్ట్రాల అసెంబ్లీలుగానీ, పార్లమెంటులోగానీ ఉన్న మంచి సంప్రదాయాలను పాటించాలి.