చిత్తూరు: ప్రేమ వ్యవహారం తెలిసి తల్లి మందలించిందని తీవ్ర మనస్తాపానికి లోనైన ఓ విద్యార్థిని ఆత్మహత్య చేసుకున్న ఘటన శనివారం జరిగింది. వెదురుకుప్పం మండలం గొడుగుచింతలో ఇంటర్ చదువుతున్న విద్యార్థిని గాయత్రి కొంతకాలంగా ఓ యువకుడిని ప్రేమిస్తోంది. ఈ విషయం తెలియడంతో ఆమెను తల్లి మందలించింది. దీంతో ఇంట్లో ఎవరూ లేని సమయంలో గాయత్రి తన వొంటిపై కిరోసిన్ పోసుకుని నిప్పంటించుకుని ఆత్మహత్య చేసుకుంది.

విశాఖ: తమిళనాడులో అదృశ్యమైన వైమానికదళ విమానంలో ప్రయాణిస్తూ ఆచూకీ లేకుండా పోయిన విశాఖ వాసుల కుటుంబాలను ఎపి సిఎం చంద్రబాబు శనివారం ఇక్కడ పరామర్శించారు. అదృశ్యమైన విమానంలో విశాఖ ప్రాంతానికి చెందినవారు 8 మంది ఉన్నారు. బాజీ జంక్షన్‌, బుచ్చిరాజుపాలెంలోని ఎన్‌ఏడీ ఉద్యోగుల కుటుంబాలను పరామర్శించి బాధితులకు ధైర్యం చెప్పారు. చిన్నారావు, నాగేందర్‌రావు కుటుంబసభ్యులను ముఖ్యమంత్రి పరామర్శించారు.

విజయవాడ: ఆధునిక టెక్నాలజీ సాయంతో నేరాలను నియంత్రించి శాంతి భద్రతలను కాపాడతామని ఎపి డిజిపిగా బాధ్యతలు చేపట్టిన నండూరి సాంబశివరావు శనివారం తెలిపారు. పదవీ విరమణ చేస్తున్న డిజిపి జెవి రాముడు నుంచి ఆయన బాధ్యతలు చేపట్టారు. తనను డిజిపిగా ఎంపిక చేసినందుకు సిఎం చంద్రబాబుకు నండూరి కృతజ్ఞతలు తెలిపారు. పోలీసు శాఖలో నిత్యం ఎదురయ్యే సవాళ్లను అధిగమిస్తూ రాష్ట్రానికి సేవలందిస్తానని ఆయన చెప్పారు.

విజయవాడ: ఎపి డిజిపి జెవి రాముడు శుక్రవారం పదవీ విరమణ చేశారు. ఈ సందర్భంగా ఆయనకు ఇక్కడి పరేడ్ గ్రౌండ్స్‌లో పోలీసులు ఘనంగా వీడ్కోలు పలికారు. రాష్ట్ర విభజన అనంతరం నవ్యాంధ్రకు తొలి డిజిపిగా గత రెండున్నరేళ్ల కాలంలో రాముడు విశేష సేవలందించారని పలువురు పోలీసు అధికారులు గుర్తు చేశారు. నూతన డిజిపిగా ఆర్టీసీ ఎండి నండూరి సాంబశివరావు బాధ్యతలు చేపట్టారు.