విశాఖపట్నం, నవంబర్ 5: పశ్చిమ మధ్య బంగాళాఖాతంలో ఏర్పడిన వాయుగుండం క్రమేపి బలహీనపడుతోంది. ఈ వాయుగుండం పశ్చిమ మధ్య బంగాళా ఖాతం నుంచి వాయువ్య బంగాళాఖాతంలోకి శనివారం మారింది. ఇది కోల్‌కత్తాకు ఆగ్నేయంగా 410 కిలో మీటర్ల దూరంలో కేంద్రీకృతమైంది. ఇది మరింత బలహీనపడి ఉత్తర ఈశాన్య దిశగా పయనిస్తుంది. దీని ప్రభావం వలన కోస్తాలో ఒకటి, రెండు చోట్ల సాధారణ వర్షాలు కురిసే అవకాశం ఉంది.

విజయవాడ, నవంబర్ 5: ఒంగోలు, పుంగనూరు పశు జాతుల పరిరక్షణకు, అభివృద్ధికి రాష్ట్ర ప్రభుత్వం ప్రత్యేక శ్రద్ధ వహిస్తుందని వ్యవసాయ, పశుసంవర్ధక, మత్స్య, మార్కెటింగ్‌శాఖల మంత్రి ప్రత్తిపాటి పుల్లారావు అన్నారు. రాష్ట్రంలో ఈ జాతుల పశువులు అంతరించిపోకూడదనే ఉద్దేశంతో, రైతులకు ఈ పశువుల ద్వారా ఆదాయం ఇచ్చే వనరుగా చేయడానికి ముఖ్యమంత్రి చంద్రబాబు కృషి చేస్తున్నారన్నారు.

విజయవాడ, నవంబర్ 5: రహదారుల నిర్మాణంతో రాష్ట్రాన్ని అభివృద్ధి పథంలో నడిపించేందుకు ప్రభుత్వం నడుం బిగించింది. 2029 నాటికి అన్ని కాలాలకు అనువైన రోడ్ల సౌకర్యం కల్పించేందుకు రంగం సిద్ధమైంది. రాజధాని ప్రాంతం నుంచి అన్ని ప్రాంతాలకు వెళ్లే రోడ్లతో అనుసంధానం చేయాలని సంకల్పించారు. ప్రస్తుతం రాష్ట్ర వ్యాప్తంగా 22 వేల కిలోమీటర్ల సిసి రోడ్లు ఉన్నాయి.

విజయవాడ, నవంబర్ 5: పఠాన్ కోట్ బాంబు పేలుడు బాధితుడు, శ్రీకాకుళం జిల్లా బిడ్డ శ్రీరాములుకు ముఖ్యమంత్రి చంద్రబాబు రూ.10 లక్షల సహాయం అందజేశారు. శనివారం ఉదయం ఉండవల్లిలోని నివాసంలో తనను కలిసిన శ్రీరాములుకు రూ.10 లక్షల చెక్‌ను స్వయంగా అందజేశారు. అతడి కుటుంబాన్ని ఆదుకుంటామని హామీ ఇచ్చారు. ఇళ్ల స్థలం మంజూరు చేస్తామని హామీ ఇచ్చిన ముఖ్యమంత్రి తగిన స్థలాన్ని గుర్తించాలని జిల్లా యంత్రాంగాన్ని ఆదేశించారు.