శ్రీశైలం, అక్టోబర్ 10: శ్రీశైలం మహాక్షేత్రంలో జరుగుతున్న శరన్నవరాత్రుల్లో భాగంగా సోమవారం శ్రీభ్రమరాంబదేవి అమ్మవారు రాజరాజేశ్వరి అలంకారంలో భక్తులకు దర్శనమిచ్చారు. శ్రీమల్లికార్జున స్వామి, అమ్మవార్లు అశ్వవాహనంపై భక్తులకు దర్శనమిచ్చారు.

తిరుమల, అక్టోబర్ 10: శ్రీవారి బ్రహ్మోత్సవాల సందర్భంగా ఇటు వాహన సేవలు చూడటానికే కాకుండా స్వామివారిని దర్శించుకోవడానికి కూడా భక్తులు పోటెత్తారని ఆలయ డిప్యూటీ ఇఓ కోదండరామారావు తెలిపారు. సోమవారం స్థానిక మీడియా సెంటర్‌లో ఆయన విలేఖర్లతో మాట్లాడుతూ 8 రోజుల వ్యవధిలో 6.74 లక్షల మంది మూలవిరాట్టును దర్శించుకున్నారని, వారు హుండీలో సమర్పించిన కానుకల ద్వారా 17.30 కోట్ల రూపాయలు ఆదాయం లభించిందన్నారు.

రాజమహేంద్రవరం, అక్టోబర్ 10: తూర్పు గోదావరి జిల్లా ధవళేశ్వరం వద్ద గోదావరి వరద ఉద్ధృతి మళ్లీ పెరుగుతోంది. ధవళేశ్వరం కాటన్ బ్యారేజి వద్ద సోమవారం మధ్యాహ్నం 8.7 అడుగులున్న నీటిమట్టం రాత్రికి 9.4 అడుగులకు పెరిగింది. బ్యారేజికివున్న మొత్తం 175 గేట్లను ఒక మీటరు మేర ఎత్తివేశారు. బ్యారేజి నుంచి 3 లక్షల 77 వేల 488 క్యూసెక్కుల వరద జలాలను సముద్రంలోకి వదిలేశారు.

విశాఖపట్నం, అక్టోబర్ 10: పౌష్టికాహార లోపంతో బాధపడుతున్న ఏజెన్సీ ప్రాంత గిరిజనులకు ఉచితంగా కందిపప్పు సరఫరా చేయాలని ప్రభుత్వం నిర్ణయించింది. రాష్ట్రం గిరిజన ప్రాంతాల్లో నెలకు కిలో చొప్పున ఏడాదిపాటు ఉచితంగా కందిపప్పు పంపిణీ చేయనున్నట్టు ముఖ్యమంత్రి చంద్రబాబునాయుడు వెల్లడించారు.