గుంటూరు: రేపల్లెలో జాస్మిన్ అనే యువతిపై అత్యాచారం చేసి, హత్య చేశారన్న ఆరోపణలపై ఇద్దరు యువకులను చితకబాదిన నిందితులను పోలీసులు సోమవారం అరెస్టు చేశారు. గ్రామస్థుల దాడిలో గాయపడిన సాయి అనే యువకుడు మరణించాడు. జాస్మిన్ ఉరివేసుకుని మరణించడాన్ని చూసిన సాయి, పవన్ అనే యువకులు గట్టిగా కేకలు వేశారు. ఈ ఇద్దరే జాస్మాన్‌ను చంపారని అనుమానించిన గ్రామస్థులు వారిని నడివీధిలో చితకబాదారు.

కర్నూలు: కృష్ణానది పుష్కరాల కోసం చేపట్టిన పనులను సకాలంలో పూర్తి చేయకుంటే సంబంధిత కాంట్రాక్టర్లను బ్లాక్‌లిస్టులో పెట్టి కఠినచర్యలు తీసుకుంటామని మంత్రి దేవినేని ఉమా అన్నారు. ఆయన సోమవారం ఉదయం శ్రీశైలంలో భ్రమరాంబ మల్లికార్జునస్వామిని సందర్శించిన అనంతరం పుష్కరాల పనులను పరిశీలించారు. ఈ పనుల్లో నాణ్యత లోపించినా, జాప్యం జరిగినా అందుకు అధికారులు కూడా బాధ్యులేనన్నారు.

కడప: జమ్మలమడుగు మండలం ఎస్.ఉప్పలపాడు వద్ద సోమవారం ఉదయం ఎదురెదురుగా వస్తున్న ఆటో, కారు ఢీకొన్న ఘటనలో ముగ్గురు మరణించారు. ఆటోలో ప్రయాణిస్తున్న వారిలో ముగ్గురు ప్రాణాలు కోల్పోగా, గాయపడిన నలుగురిని ఆస్పత్రికి తరలించారు.

కాకినాడ, జూలై 17: వినియోగదారుడి కళ్ళు బైర్లుకమ్మే రీతిలో మార్కెట్‌లో పప్పుల ధరలు ఆకాశన్నంటాయి. రెండేళ్లలో పప్పుల ధరలు మూడు, నాలుగు రెట్లు పెరిగాయి. కేవలం రెండు నెలల వ్యవధిలో ఊహించని ధరకు పప్పు ధాన్యాలు చేరాయి. అమాంతం పెరిగిన ధరలు చూసి ముక్కున వేలేసుకుంటున్నారు. పప్పు దినుసులతోపాటు నిత్యావసరాలైన చక్కెర, ఎండుమిర్చి, వెల్లుల్లి, మసాలా దినుసులకు రెక్కలొచ్చాయి.