విజయవాడ, జూలై 16: రాష్ట్రంలో ఒక కోటీ 35 లక్షల 31వేల మంది అత్యల్ప ఆదాయ వర్గాల కుటుంబాలకు రేషన్ కార్డులు అందివ్వడం జరిగిందని వీరిలో ఎస్‌సి, ఎస్‌టి కుటుంబాలు 17లక్షల 06వేలు వున్నాయని, అయితే వీరిలో 78వేల 029 మంది రేషన్ సరుకులు తీసుకువెళ్లటం లేదని గుర్తించటం జరిగిందని రాష్ట్ర పౌరసరఫరాల శాఖ మంత్రి పరిటాల సునీత తెలిపారు.

బళ్ళారి, జూలై 16: తుంగభద్ర జలాశయానికి ఇన్‌ఫ్లో కొనసాగుతోంది. ఎగువ ప్రాంతాలో కురుస్తున్న వర్షం నీరు, తుంగ జలాశయం నుంచి విడుదలైన నీళ్లు జలాశయానికి చేరుకుంటున్నాయి. శనివారం జలాశయానికి 1.5 టిఎంసిల నీరు వచ్చి చేరింది. దీంతో జలాశయం నీటి నిల్వ 36.683 టిఎంసిలకు చేరింది. ఇన్‌ఫ్లో 16 వేల క్యూసెక్కులుగా నమోదైంది. నీటిమట్టం 1610.74 అడుగులకు చేరుకుంది.

హైదరాబాద్, జూలై 16: అవినీతిలో ఆంధ్రప్రదేశ్ నెంబర్-1గా నిలిచిందని ఎపి కాంగ్రెస్ నాయకుడు, శాసనమండలిలో ప్రతిపక్ష నేత సి. రామచంద్రయ్య విమర్శించారు. అవినీతి రహిత రాష్ట్రంగా పేరు సంపాదించినప్పుడే పెట్టుబడులు వస్తాయని ఆయన శనివారం ఇక్కడ విలేఖరుల సమావేశంలో మాట్లాడుతూ అన్నారు. పెట్టుబడులు రాబట్టేందుకు విదేశీ విహారాలు చేసినంత మాత్రాన పరిశ్రమల స్థాపనకు ఎవరూ ముందుకు రారని ఆయన తెలిపారు.

హైదరాబాద్: ఆంధ్రప్రదేశ్‌కు మేలు జరిగేలా పార్లమెంటులో తమ గళం విప్పుతామని వైకాపా ఎంపీ మేకపాటి రాజమోహన్‌రెడ్డి తెలిపారు. అవసరమైతే అన్ని పక్షాలను కలుపుకుపోయి రాష్ట్రానికి మంచి జరిగేలా కృషి చేస్తామన్నారు. విభజన చట్టంలో హామీలు, పోలవరం ప్రాజెక్టు, రైల్వేజోన్ ఏర్పాటు, కేంద్రం నిధులు, ప్రత్యేక హోదా వంటి అంశాలపై తమ ఎంపీలు పోరాడతారని ఆయన ప్రకటించారు.