గుంటూరు: కాపుగర్జన సందర్భంగా రత్నాచల్ ఎక్స్‌ప్రెస్ రైలును దగ్ధం చేసినవారిని చట్ట ప్రకారం శిక్షించాలా? వద్దా?- అని ఎపి మంత్రి నారాయణ కాపు నాయకుడు ముద్రగడ పద్మనాభంను మంగళవారం ప్రశ్నించారు. నిందితులపై పోలీసులు చట్ట ప్రకారం కేసులు నమోదు చేస్తారని, ఇందులో ప్రభుత్వ ప్రమేయం ఏమీ ఉండదన్నారు. కాపులకు సిఎం చంద్రబాబు చేస్తున్న మేలును చూసి ఓర్వలేకే ముద్రగడ అరాచక శక్తులతో చేతులు కలిపారని ఆయన ఆరోపించారు.

కాకినాడ: తుని విధ్వంసకాండకు సంబంధించి అరెస్టు చేసిన వారిని విడిచిపెట్టేంత వరకూ తాను పోలీస్ వ్యాన్ దిగేది లేదని కాపు నాయకుడు ముద్రగడ పద్మనాభం పట్టువీడక పోవడంతో కిర్లంపూడిలో ఉద్రిక్తత ఏర్పడింది. అమలాపురం నుంచి ఆయనను సిఐడి పోలీసులు కిర్లంపూడికి వ్యాన్‌లో తీసుకుని వచ్చారు. ఇంటి వద్ద ఆయనను విడిచిపెట్టేందుకు పోలీసులు ప్రయత్నించినా వ్యాన్ దిగేందుకు ముద్రగడ నిరాకరించారు.

కాకినాడ: కాపుగర్జన సందర్భంగా తుని వద్ద జరిగిన విధ్వంసకాండలో అరెస్టు చేసిన అయిదుగురి వివరాలను సిఐడి పోలీసులు మంగళవారం మీడియాకు వెల్లడించారు. వీరిని కాకినాడ కోర్టులో హాజరు పరిచారు. నిందితుల పేర్లు: దూడల మహేంద్ర(అమలాపురం) , కూరాకుల దొరబాబు(పిఠాపురం) , మహేష్‌ (గుంటూరు), పవన్‌కుమార్‌(గుంటూరు) , నక్కా సాయి(తూర్పుగోదావరి).

కాకినాడ: కాపుగర్జన సందర్భంగా తుని వద్ద జరిగిన విధ్వంసకాండలో నిందితులకు సంబంధించి తమ వద్ద బలమైన సాక్ష్యాధారాలున్నాయని సిఐడి పోలీసులు మంగళవారం మీడియాకు వివరించారు. రత్నాచల్ ఎక్స్‌ప్రెస్ దగ్ధమైనపుడు వీడియోలు, ఫొటోల ఆధారంగా నిందితులను గుర్తించి అరెస్టు చేస్తున్నామని వారు తెలిపారు. తుని ఘటనలో అరెస్ట్ చేసిన దూడల మణీంద్ర అమలాపురంలో రౌడీషీటర్ అని సీఐడీ తేల్చింది.