విజయవాడ: నదీ జలాల వాటాలో అన్యాయం జరిగిందంటూ తెలంగాణ నేతలు దేశ రాజధానిలో అనవసర రాద్ధాంతం చేస్తున్నారని ఎపి ఇరిగేషన్ మంత్రి దేవినేని ఉమా మంగళవారం ఇక్కడ మీడియాతో అన్నారు. బచావత్ అవార్డు ప్రకారమే ఎపి, తెలంగాణలకు నీటిని కేటాయిస్తున్నారన్నారు. విభజన చట్టానికి నాడు అంగీకరించిన టి.నేతలు ఇపుడు కృష్ణా రివర్ బోర్డు నిర్ణయాలను అంగీకరించమంటూ ప్రకటనలు చేయడం రాజ్యాంగ విరుద్ధమన్నారు.

కాకినాడ: తుని విధ్వంసకాండకు సంబంధించి కొంతమంది నిందితులను అరెస్టు చేయడంతో తనను కూడా అరెస్టు చేయాలంటూ కాపు ఉద్యమనేత, మాజీ మంత్రి ముద్రగడ పద్మనాభం మంగళవారం ఉదయం అమలాపురం పోలీస్ స్టేషన్‌లో బైఠాయించారు. ఆయన అనుచరులు కూడా పోలీస్ స్టేషన్ ఆవరణలో బైఠాయించడంతో ఏం చేయాలో తోచక పోలీసులు తలలు పట్టుకున్నారు. స్థానిక పోలీసులు జిల్లా కేంద్రంలోని ఉన్నతాధికారులతో సంప్రదిస్తున్నారు.

అనంతపురం సిటీ, జూన్ 6: పదేళ్లపాటు పాలించిన కాంగ్రెస్ ప్రభుత్వం దేశాన్ని అవినీతిలో ముంచెత్తిందని కేంద్ర పర్యావరణ, అటవీశాఖ మంత్రి ప్రకాష్ జవదేకర్ అన్నారు. సోమవారం అనంతపురం నగరంలో ఆయన విలేఖరులతో మాట్లాడుతూ కాంగ్రెస్ పార్టీ కుంభకోణాల్లో కూరుకుపోయిందన్నారు. 2జి, బొగ్గు, స్పెక్ట్రమ్, భూగర్భజలాలు, విమానయానరంగం, పంచభూతాలను సైతం వదలకుండా కాంగ్రెస్ మంత్రులు వేల కోట్ల దోచుకున్నారని ధ్వజమెత్తారు.

నూజివీడు, జూన్ 6: కృష్ణా జిల్లా ఆగిరిపల్లిలో దళితరత్న అవార్డు గ్రహీత, మంత్రి రావెల కిషోర్‌బాబు, ఏలూరు ఎంపి మాగంటి వెంకటేశ్వరరావు ముఖ్య అనుచరుడిగా ఉంటూ ప్రైవేటు దందాలు చేస్తున్న పాలేటి మహేశ్వరరావు, అతని అనుచరులు సోమవారం పోలీసులపై దాడికి పాల్పడ్డారు. సాక్షాత్తూ ఎస్‌ఐపై దాడి చేయబోగా అడ్డుగా వచ్చిన కానిస్టేబుళ్లపై వారు దాడులకు తెగబడ్డారు. ఈ సంఘటన ఆగిరిపల్లిలో తీవ్ర ఉద్రిక్తతకు దారితీసింది.