ఆదోని, నవంబర్ 22: ఉల్లి ధర కిలో రూ.2కు పడిపోవడంతో రైతులు ఆందోళన చెందుతున్నారు. కర్నూలు జిల్లా ఆదోని మార్కెట్‌లో వ్యాపారులు గురువారం రైతుల నుంచి కింటాలు ఉల్లిని రూ.200కు కొనుగోలు చేశారు. ధర ఒక్కసారిగా పడిపోవడంతో ఉల్లిరైతులు డీలా పడ్డారు. అప్పు చేసి పంట సాగుచేస్తే చివరకునష్టాలు వచ్చాయని వాపోయారు. ధర అమాంతం పడిపోవడంతో లారీల బాడుగ కూడా రాని పరిస్థితి నెలకొందని భోరుమన్నారు.

ముంబయి, నవంబర్ 22: బంగా రం ధర గురువారం స్వల్పంగా పెరిగింది. బులియన్ మార్కెట్ దాదాపుగా స్థిరంగా కొనసాగడంతో, చివరికి 10 గ్రాముల బంగారం ధర 90 రూపాయలకు పెరిగి, 32,040 రూపాయలకు చేరింది. ఈనెల 26న 32,015 రూపాయలుగా ఉన్న ధర ఆతర్వాత 32,100 రూపాయలకు చేరింది. కానీ, 20న 32,000 రూపాయలకు, బుధవారం 31,950 రూపాయలకు పడిపోయింది. కానీ, గురువారం తేరుకొని, స్వల్ప పెరుగుదలను నమోదు చేసింది.

హైదరాబాద్, నవంబర్ 22: గృహ, వాణిజ్య అవసరాలకు అనుగుణంగా టీవీఎస్ నూతనంగా రూపొందించిన టీవీఎస్ ఎక్స్‌ఎల్ 100 హెవీడ్యూటీ ఐ టచ్ స్టార్ట్ వాహనం మార్కెట్‌లోకి విడుదల చేశారు. మొబైల్ చార్జింగ్ యూనిట్ ఉండటం దీని ప్రత్యేకత. నగరంలో జరిగిన కార్యక్రమంలో టీవీఎస్ ఎక్స్‌ఎల్ 100 ‘ఐ టచ్ స్టార్ట్’ వాహనంను యుటిలిటీ ప్రోడక్ట్స్ సంస్థ ఉపాధ్యక్షుడు వైద్యనాథన్, కంపెనీ ప్రతినిధి బాలాజీలు మార్కెట్‌లోకి విడుదల చేశారు.

న్యూఢిల్లీ, నవంబర్ 22: కష్టాల్లో కూరుకుపోయిన ఐఎల్ అండ్ ఎఫ్‌ఎస్ గ్రూప్‌లోని రవాణా నెట్‌వర్క్స్ విభాగం గడచిన త్రైమాసిక ఫలితాలను ప్రకటించడంలో ఆలస్యం అవుతోంది. ఎన్‌సీఎల్‌టీ ఇన్‌సాల్వెన్సీ ప్రొసీడింగ్స్ కారణంగానే త్రైమాసిక ఆర్థిక పరిస్థితులను స్టాక్ ఎక్చేంజీల్లో ఫైల్ చేయడంలో ఆలస్యం జరిగిందని ఆ విభాగం గురువారం ఓ ప్రకటనలో తెలిపింది. త్వరలో తమ వివరాలను ప్రకటిస్తామని చెలిపింది.