ముంబయి, నవంబర్ 27: రూపాయి మంగళవారం స్వల్పంగా బలపడింది. క్రితం ముగింపుతో పోలిస్తే మంగళవారం డాలర్‌తో రూపాయి మారకం విలువ ఎనిమిది పైసలు పుంజుకొని, 70.79 వద్ద ముగిసింది. ఎగుమతిదారుల నుంచి డాలర్ల విక్రయం పెరగడంతో పాటు అంతర్జాతీయ మార్కెట్‌లో ముడి చమురు ధరలు తగ్గడం రూపాయి స్వల్పంగా బలపడటానికి దోహదపడింది.

న్యూఢిల్లీ, నవంబర్ 27: ఎగుమతి రంగం నిధుల సమస్యను ఎదుర్కొంటోందని కేంద్ర వాణిజ్య, పరిశ్రమల శాఖ మంత్రి సురేశ్ ప్రభు తెలిపారు. ఈ సమస్యను కేంద్ర ఆర్థిక మంత్రిత్వ శాఖ దృష్టికి తీసికెళ్లినట్టు ఆయన చెప్పారు. ఎగుమతి రంగానికి నిధులు తగ్గుతున్నాయని, అందువల్ల ఎగుమతిదారులకు తగినన్ని నిధులు అందుబాటులో ఉండేట్టుగా చూడాలని తాను ఆర్థిక మంత్రిత్వ శాఖను కోరినట్టు సురేశ్ ప్రభు మంగళవారం ఇక్కడ విలేఖరులకు తెలిపారు.

న్యూఢిల్లీ, నవంబర్ 26: పది గ్రాముల బంగారం ధర సోమవారం 100 రూపాయలు పెరిగింది. అంతర్జాతీయ సెంటిమెంట్ బాగా పని చేయడంతో, దేశీయ నగల వ్యాపారులు కొనుగోలు పట్ల ఆసక్తిని ప్రదర్శించారు. బులియన్ మార్కెట్ సానుకూల సూచీలను నమోదు చేయడంతో పది గ్రాముల బంగారం ధర 31,850 రూపాయలకు చేరింది. గత వారం 31,750 రూపాయలుగా ఉన్న పసిడికి మళ్లీ డిమాండ్ పెరిగింది. అంతర్జాతీయ మార్కెట్‌లో బంగారం 1,224.30 డాలర్లకు ట్రేడ్ అయింది.

ముంబయి, నవంబర్ 26: వరుసగా మూడు సెషన్లలో నష్టాలను చవిచూసిన స్టాక్ మార్కెట్ ఎట్టకేలకు కోలుకుంది. ఈవారం శుభారంభం చేసింది. ఫాస్ట్ మూవింగ్ కన్జూమర్ గూడ్స్ (ఎఫ్‌ఎంసీజీ), ఆటో రంగాలు కోలుకోవడంతో సెనె్సక్స్ 373.06 పాయింట్లు (1.07 శాతం) పెరిగి, 35,354.08 పాయింట్ల వద్ద ముగిసింది. ఎఫ్‌ఎంజీసీ, ఆటోతోపాటు బ్యాంకింగ్ స్టాక్స్ ట్రేడింగ్ కూడా ఆశాజనకంగా కొనసాగింది.