న్యూఢిల్లీ, మార్చి 13: మంత్రుల దగ్గర నుంచి అధికారుల వరకూ డ్యామ్‌లు నిర్మాణమంటే అమితానందం చూపిస్తారని, పరివాహక ప్రాంతాల అభివృద్ధి మాత్రం వారికి ఏమాత్రం శ్రద్ధ ఉండదని కేంద్ర మంత్రి నితిన్ గడ్కరీ స్పష్టం చేశారు. డ్యామ్‌ల నుంచి వచ్చే నీటిని సద్వినియోగం చేసుకోవడంపై మాత్రం వారికి ఏ మాత్రం శ్రద్ధ చూపరని ఆయన అన్నారు.

కోహిమా, మార్చి 13: నాగాలాండ్‌లో కొత్తగా ప్రభుత్వాన్ని ఏర్పాటు చేసిన నీఫియూ రియో మంగళవారం అసెంబ్లీలో జరిగిన విశ్వాస పరీక్ష విజయం సాధించారు. ఈ నెల 8న రియో ముఖ్యమంత్రిగా బాధ్యతలు చేపట్టిన విషయం తెలిసిందే. 60 మంది సభ్యులున్న అసెంబ్లీలో రియోకు అనుకూలంగా 33 ఓట్లు, వ్యతిరేకంగా 26 ఓట్లు పడ్డాయి. ఎన్నికలు జరిగిన 59 స్థానాల్లో గెలుపొందిన ఎమ్మెల్యేలందరూ విశ్వాస పరీక్షలో పాల్గొన్నారు.

న్యూఢిల్లీ : ఛత్తీస్‌గఢ్‌లో సీఆర్‌పీఎఫ్ సిబ్బందిపై మావోయిస్టుల మెరుపుదాడిపై కేంద్ర హోం మంత్రి రాజ్‌నాథ్ సింగ్ తీవ్ర ఆవేదన వ్యక్తం చేశారు. సుక్మా జిల్లాలో కిస్తారాం-పలోడీ జిల్లాల మధ్య జరిగిన ఐఈడీ పేలుడుపై ఆయన మంగళవారం ట్విటర్ వేదికగా స్పందించారు. ఈ దుర్ఘటనలో అమరులైన తొమ్మిది మంది సీఆర్‌పీఎఫ్ జవాన్లకు నివాళులర్పించారు. గాయపడిన జవాన్లు సత్వరం కోలుకోవాలని ఆకాంక్షించారు.

న్యూఢిల్లీ : విదేశీ న్యాయవాద సంస్థల న్యాయవాదులు విదేశీ చట్టాలపై న్యాయ సలహాలు ఇవ్వవచ్చునని, బార్ కౌన్సిల్ ఆఫ్ ఇండియా ప్రవర్తనా నియమావళికి లోబడి పనిచేయవలసిందేనని సుప్రీంకోర్టు మంగళవారం స్పష్టం చేసింది. విదేశీ న్యాయవాద సంస్థలు భారతదేశంలో తమ కార్యాలయాలను ఏర్పాటు చేయరాదని పేర్కొంది. జస్టిస్ ఆదర్శ్ కుమార్ గోయల్, జస్టిస్ ఉదయ్ ఉమేశ్ లలిత్ ధర్మాసనం ఈ తీర్పు చెప్పింది.