యలమంచిలి, జూలై 26: పాలకొల్లు ఎమ్మెల్యే నిమ్మల రామానాయుడు మంగళవారం చింతదిబ్బ గ్రామంలో వరినాట్లు తీసి అసలు సిసలైన రైతుగా మారారు. స్వచ్ఛమేవ జయతేలో భాగంగా వరినాట్లు తీసి కట్టలు కట్టి నాట్లువేసే మహిళలకు ఆయన అందించారు. అర ఎకరం భూమి నాట్లు వేసే వరకు ఆయన చేలోనే ఉన్నారు.

జగ్గయ్యపేట రూరల్, జూలై 26: మండలంలోని ముక్త్యాలలో 15రోజుల ముందుగానే పుష్కర సందడి నెలకొంది. సూర్యకాలమాన ప్రకారం మంగళవారం నుండే పుష్కరుడు నదిలో ప్రవేశిస్తాడని ఆ సమయంలో పుష్కర స్నానాలు మంచిదని పండితుల నిర్ణయం మేరకు బలుసుపాడు గురుధామ్ వ్యవస్థాపకులు తాత్వికులు గెంటేల వెంకట రమణ ఆధ్వర్యంలో భక్తులు పెద్ద సంఖ్యలో పుష్కర స్నానం చేపట్టారు.

అవనిగడ్డ, జూలై 26: మండల పరిధిలో వనం-మనం కార్యక్రమంలో భాగంగా 30వేల మొక్కలు నాటేందుకు ప్రణాళిక రూపొందించాలని శాసనసభ ఉప సభాపతి మండలి బుద్ధప్రసాద్ అధికారులకు సూచించారు. మండల పరిషత్ కార్యాలయంలో మంగళవారం ఏర్పాటు చేసిన వనం-మనం కార్యక్రమంలో ఆయన మాట్లాడారు. హరితాంధ్రప్రదేశ్‌గా రూపొందించేందుకు పర్యావరణ సమతుల్యత కోసం విధిగా మొక్కలు నాటాలన్నారు. ఇందుకు ప్రజలను చైతన్యపర్చటంలో అధికారులు కృషి చేయాలన్నారు.

మచిలీపట్నం, జూలై 26: కృష్ణా పుష్కరాలకు వచ్చే భక్తుల భద్రతకు ఏమాత్రం ముప్పు రాకుండా రక్షణ చర్యలు చేపడుతున్నట్లు ఏలూరు రేంజ్ డిఐజి పివిఎస్ రామకృష్ణ శర్మ తెలిపారు. మంగళవారం జిల్లా పోలీసు కార్యాలయ సమావేశ మందిరంలో ఏలూరు రేంజ్ పరిధిలోని కృష్ణా, ఉభయ గోదావరి జిల్లాల పోలీసు ఉన్నతాధికారులతో సమీక్ష సమావేశం నిర్వహించారు. పుష్కర ఘాట్లు, పుష్కర నగర్‌ల వద్ద తీసుకోవల్సిన జాగ్రత్తలు, బందోబస్తుపై సూచనలు చేశారు.