ముంబయి, డిసెంబర్ 6: ప్రపంచ సంకేతాలు బలహీనంగా ఉండటంతో పాటు రూపాయి బలహీనపడటం, దేశీయ, విదేశీ మదుపరులు విక్రయాలకు పూనుకోవడం వల్ల దేశీయ స్టాక్ మార్కెట్లు వరుసగా మూడోరోజు గురువారం నష్టపోయాయి. బొంబాయి స్టాక్ ఎక్స్చేంజ్ (బీఎస్‌ఈ) సెనె్సక్స్ 572.28 పాయింట్లు (1.59 శాతం) పడిపోయి, 35,312.13 పాయింట్ల వద్ద ముగిసింది.

వరదయ్యపాళెం, డిసెంబర్ 6: చిత్తూరు - నెల్లూరు జిల్లాల సరిహద్దులో ఏర్పాటైన శ్రీసిటీ పారిశ్రామికవాడలోని ఆల్‌స్టాం ట్రాన్స్‌పోర్ట్ పరిశ్రమలో తయారుచేసిన మెట్రో రైలును విజయవంతంగా ఆస్ట్రేలియా దేశంలోని సిడ్నీ నగరానికి తరలించారు. గురువారం జరిగిన ఈ కార్యక్రమంలో కంపెనీ ప్రతినిధులు జెండా ఊపి లాంఛనంగా తరలించారు.

న్యూఢిల్లీ, డిసెంబర్ 6: దేశంలో బంగారం ధర గురువారం పది గ్రాములకు రూ. 170 పెరిగింది. ప్రపంచ మార్కెట్‌లో పసిడి ధరలు పటిష్టంగా ఉండటంతో పాటు స్థానిక నగల వ్యాపారుల నుంచి డిమాండ్ పెరగడంతో ఢిల్లీలోని బులియన్ మార్కెట్‌లో పది గ్రాముల బంగారం ధర రూ. 170 పెరిగి, రూ. 32,120కి చేరుకుంది. వెండి ధర కూడా కిలోకు రూ. 25 చొప్పున పెరిగి, రూ. 37,625 వద్ద ముగిసింది.

న్యూఢిల్లీ, డిసెంబర్ 6: గత ఏడాది పబ్లిక్ రంగ బ్యాంకుల పనితీరును దృష్టిలో ఉంచుకుని కేంద్ర ఆర్థిక మంత్రిత్వ శాఖ కొన్ని దిద్దుబాటు చర్యలకు ఉపక్రమించింది. ఇందులో భాగంగా పనితీరును మెరుగుపరిచేలా అదనపుమూలధనం ఏర్పాటుచేసే అవకాశాలున్నాయని, అనేక బ్యాంకులు ఈ సౌకర్యాన్ని సంతరించుకునే వీలుందని ఆర్థిక నిపుణులు పేర్కొంటున్నారు.