తంజావూర్, జనవరి 2: ప్రభుత్వ పాలనా వ్యవహారాల్లో గవర్నర్ జోక్యం పెరుగుతోందంటూ డిఎంకె కార్యకర్తలు మంగళవారం ఇక్కడ నిరసన ప్రదర్శనలు నిర్వహించారు. నల్లజెండాలు ప్రదర్శించి నినాదాలు చేశారు. స్వచ్ఛ్భారత్ అమలుపై సమీక్ష జరిపేందుకు రెండు రోజుల పర్యటన నిమిత్తం గవర్నర్ భన్వారీలాల్ పురోహిత్ తంజావూర్ వచ్చారు. ఇలాంటి సమీక్షా సమావేశాలు జరపడం ప్రభుత్వ పాలనా వ్యవహారాల్లో జోక్యం చేసుకోవడమేనని డిఎంకె ధ్వజమెత్తింది.

న్యూఢిల్లీ, జనవరి 2: బధిర బాలిక అత్యాచార బాధితురాలికి 15 లక్షల రూపాయల నష్టపరిహారాన్ని ఏకకాలంలోనే చెల్లించాలని హిమాచల్‌ప్రదేశ్ ప్రభుత్వాన్ని సుప్రీంకోర్టు మంగళవారం ఆదేశించింది. హిమాచల్‌ప్రదేశ్‌కు చెందిన ఈ బాలిక అత్యాచార కేసులో హైకోర్టు ఇచ్చిన తీర్పును సవరిస్తూ ఆదేశాలు జారీచేసింది. అత్యాచారానికి గురైన ఈ బాలిక ఆడ శిశువుకు జన్మనిచ్చింది.

జమ్మూ, జనవరి 2: ప్రసిద్ధ పుణ్యక్షేత్రం మాతా వైష్ణోదేవి ఆలయాన్ని సందర్శించే భక్తుల సంఖ్య ప్రతి ఏటా పెరుగుతోంది. గత ఏడాది 81 లక్షల 78వేలమంది భక్తులు ఆలయాన్ని సందర్శించారని, 2016తో పోలిస్తే 4 లక్షల 54వేలమంది యాత్రికులు పెరిగారని అధికార ప్రతినిధి ఒకరు వెల్లడించారు.

న్యూఢిల్లీ, జనవరి 2: దేశ రెండో రాజధానిగా ఏర్పాటుకు ఎటువంటి ప్రణాళిక లేదని కేంద్ర హోంశాఖ వెల్లడించింది. మంగళవారం టీఆర్‌ఎస్ ఎంపీ బూరనర్సయ్యగౌడ్ దక్షిణ భారతదేశంలో రెండో రాజధానిగా హైదరాబాద్‌ను ఏర్పాటు చేసే ప్రతిపాదన ఏమైనా ఉందా అని లోక్‌సభలో అడిగిన ప్రశ్నకు కేంద్ర హోంశాఖ సహాయమంత్రి హన్స్‌రాజ్ గంగారాం అహిర్ రాతపూర్వక సమాధానం ఇచ్చారు.
కాపు రిజర్వేషన్ల బిల్లు ఇంకా చేరలేదు: కేంద్రం