న్యూఢిల్లీ, అక్టోబర్ 15: మాజీ రాష్ట్రపతి అబ్దుల్ కలామ్ వివిధ రంగాల్లో దేశానికి చేసిన సేవలను రాష్ట్రపతి రామ్‌నాథ్ కోవింద్, ప్రధాని నరేంద్రమోదీ శ్లాఘించారు. కలామ్ 87వ జయంతి సందర్భంగా ఆయనకు రాష్ట్రపతి, ప్రధాని నివాళి అర్పించారు. ఈ సందర్భంగా ట్వీట్ చేసిన మోదీ అబ్దుల్ కలామ్ అద్భుతమైన స్పూర్తి ప్రధాతగా అభివర్ణించారు. 11వ రాష్ట్రపతిగా ఆయన సేవలు నిరుపమానమన్నారు.

చెన్నై, అక్టోబర్ 15: గతంలో లైంగిక వేధింపులకు గురైన మహిళలను ‘మీటూ’ ఉద్యమం పేరుతో బయటకు వస్తున్న నేపథ్యంలో విలక్షణ నటుడు కమల్‌హసన్ తనదైన రీతిలో స్పందించారు. ఈ విషయంలో కేవలం సినిమా రంగానే్న తప్పుపట్టడానికి వీల్లేదని ఆయన స్పష్టం చేశారు. ఆరోపణలు వెలుగుచూసినప్పుడు ఇరువర్గాల వాదనలు వినాల్సిన అవసరం ఉందని పేర్కొన్న ఆయన లైంగిక వేధింపులన్నది అన్ని రంగాల్లోనూ ఉన్నాయన్న విషయాన్ని మరచిపోకూడదని చెప్పారు.

కేరళ: శబరిమల ఆలయంలోకి మహిళల వెళ్లవచ్చని సుప్రీం కోర్టు తీర్పును వ్యతిరేకిస్తూ గత వారం ప్రారంభించిన ర్యాలీ కేరళ రాజధాని తిరువనంతపురానికి చేరుకుంది. ఈ ర్యాలీలో మహిళలు అధిక సంఖ్యలో పాల్గొన్నారు. నెలవారీ పూజల నిమిత్తం బుధవారం ఆలయాన్ని తెరవనున్న నేపథ్యంలో ఈ ఆందోళన మరింత ఉధృతమైంది. మహిళలను ఆలయంలోకి ప్రవేశించకుండా అడ్డుకుంటామని ఆందోళనకారులు హెచ్చరించారు.

బెంగళూరు: విద్యార్థులకు పాఠాలు బోధిస్తున్న ఓ ప్రధానోపాధ్యాయుడ్ని ఆరుగురు దుండగులు హతమార్చారు. అగ్రహార్ దసరహల్లీ ఉపనగర్‌లోని హవానూర్ పబ్లిక్ స్కూలులో ఈ ఘటన చోటుచేసుకుంది. పాఠశాలకు సంబంధించిన భూవివాదాలే కారణమని వెల్లడైంది. అరవై ఏళ్ల ప్రధానోపాధ్యాయుడు రంగనాథ్ ఈ హత్యకు గురయ్యారు.