మాంచెస్టర్, జూలై 4: ఇంగ్లాండ్‌తో జరిగిన తొలి టీ-20 ఇంటర్నేషనల్ మ్యాచ్‌లో టీమిండియా ఎనిమిది వికెట్ల తేడాతో ఘనవిజయం సాధించింది. భారత ఎడమచేతి మణికట్టు మాంత్రికుడు కుల్దీప్‌యాదవ్ జట్టు గెలుపులో కీలక భూమిక పోషించాడు. మంగళవారం రాత్రి జరిగిన మ్యాచ్‌లో తొలుత బ్యాటింగ్‌కు దిగిన ఇయాన్ మోర్గాన్ నేతృత్వంలోని ఇంగ్లాండ్ నిర్ణీత 20 ఓవర్లలో ఎనిమిది వికెట్లు కోల్పోయి 159 పరుగులు చేసింది.

మాంచెస్టర్: విరాట్ కోహ్లీ టీ20ల్లో మరో రికార్డు నమోదు చేశారు. అంతర్జాతీయ టీ20లో వేగంగా రెండు వేల పరుగుల మైలురాయిని అందుకున్న ఆటగాడిగా కోహ్లీ రికార్డు సృష్టించాడు. ఇప్పటివరకు 60 మ్యాచ్‌లాడిన కోహ్లీ 56 ఇన్నింగ్స్‌ల ద్వారా 2012 పరుగులు చేశాడు.

దుబాయ్, జూలై 3: ఇకముందు బాల్ ట్యాంపరింగ్‌కు పాల్పడే క్రికెటర్లపై కఠిన శిక్షలు అమలు చేయనున్నారు. డబ్లిన్‌లో జరిగిన వార్షిక సమావేశ ముగింపులో ఈమేరకు ఇంటర్నేషనల్ క్రికెట్ కౌన్సిల్ (ఐసీసీ) నిర్ణయం తీసుకుంది. బాల్ ట్యాంపరింగ్‌పై అధికారులు, కమిటీలు సూచించిన వివిధ అంశాలను ఐసీసీ పాలక కమిటీ ఆమోదించింది. ఈ నిర్ణయం ప్రకారం.. బాల్ ట్యాంపరింగ్‌కు పాల్పడే క్రికెటర్ల ఖాతాలో 12 డీమెరిట్ పాయింట్లు జమ చేస్తారు.

హరారే, జూలై 3: టీ-20 ఇంటర్నేషనల్ మ్యాచ్‌లో రెండు ప్రపంచ రికార్డులు నమోదయ్యాయి. ఇక్కడి స్పోర్ట్స్ క్లబ్‌లో మంగళవారం జింబాబ్వేతో జరిగిన టీ-20 ముక్కోణపు టోర్నమెంట్‌లో ఆస్ట్రేలియా కెప్టెన్ అరోన్ ఫించ్ 172 పరుగులతో సరికొత్త రికార్డును తిరగరాయగా, తన ఓపెనింగ్ పార్ట్‌నర్ డీఆర్సీ షార్ట్‌తో కలసి పింఛ్ 223 అత్యధిక పరుగుల భాగస్వామ్యం నెలకొల్పి మరో ప్రపంచ రికార్డు సృష్టించాడు.