హైదరాబాద్: రాబోయే ఎన్నికల్లో మహబూబ్‌నగర్ నుంచి పోటీ చేస్తానని కాంగ్రెస్ ఎంపీ జైపాల్ రెడ్డి స్పష్టంచేశారు. కేసీఆర్‌కు నిజమైన ప్రత్యర్థి కాంగ్రెస్ అని అన్నారు. కేసీఆర్ పచ్చి అవకాశవాది అని అన్నారు. ఎన్నికల తరువాత బిజెపితో కలుస్తారని అన్నారు. మోదీనే కాదు రాహుల్‌ను కూడా కేసీఆర్ ఎకవచనంతో సంబోధిస్తారని విమర్శించారు.

విశాఖపట్నం: ఐదవ తేదీ నుంచి శాసనసభ సమావేశాలు జరుగుతున్న నేపథ్యంలో అనుసరించాల్సిన వ్యూహంపై చర్చించేందుకు శనివారంనాడిక్కడ బిజెపి ప్రతినిధుల సమావేశం జరిగింది. జాతీయ నేత సతీష్‌జీ సమావేశానికి హాజరయ్యారు. ఆంధ్రప్రదేశ్‌కు కేంద్రం ఏమి చేసింది, ఏమి చేయబోతుందో చెబుతామని ఎంపి హరిబాబు వెల్లడించారు. ఈ సమావేశానికి మంత్రులు, ఎమ్మెల్యేలు తదితరులు హాజరయ్యారు.

తిరుపతి, మార్చి 2: శ్రీవారి ఆర్జిత సేవలకు సంబంధించి జూన్ నెల కోటాలో మొత్తం 56,424 టిక్కెట్లను శుక్రవారం ఉదయం 10 గంటలకు టీటీడీ ఈఓ అనిల్‌కుమార్ సింఘాల్ విడుదల చేశారు. ఆన్‌లైన్ డిప్ విధానంలో 11,149 సేవా టిక్కెట్లు విడుదల చేసినట్లు ఈ సందర్భంగా ఈఓ తెలిపారు. ఇందులో సుప్రభాతం - 7854, తోమాల-120, అర్చన -120, అష్టదళపాదపద్మారాధన - 180, నిజపాద దర్శనం -2875 టిక్కెట్లు ఉన్నాయని తెలిపారు.

తిరుపతి, మార్చి 2: వేదం మనస్సుకు అలౌకిక ఆనందాన్ని ఇస్తుందని, స్వామివారి దర్శనానికి ఎంతగా శ్రమిస్తామో, వేదం శ్రవణం చేయడానికి అంతగా శ్రమించాలని కేంద్ర మానవ వనరుల శాఖ సహాయ మంత్రి సత్యపాల్ సింగ్ సూచించారు. ఉజ్జయిని మహర్షి సాందీపని వేదవిద్యాప్రతిష్టాన్, శ్రీ వేంకటేశ్వర వేద విశ్వవిద్యాలయం సంయుక్త ఆధ్వర్యంలో దక్షిణ భారత వేద సమ్మేళనాన్ని కేంద్ర మంత్రి ప్రారంభించారు.