రాష్ట్రంలో ప్రైవేటు విశ్వవిద్యాలయాలు నెలకొల్పాల్సిన అవసరం ఎంతైనా ఉంది. రాష్ట్రంలో ఏ ఏడాదికాయేడాది ఉన్నత విద్యను అభ్యసిస్తున్న వారి సంఖ్య పెరుగుతూ వస్తొంది. అందరు ఉన్నత విద్యను అభ్యసించాలంటే అందుకు అనుగుణంగా విశ్వవిద్యాలయాలు అందుబాటులో ఉండాలి. నేడు వెనుకబడిన ప్రాంతాల నుంచి కూడా ఉన్నత విద్యాభ్యాసానికి ఇతర రాష్ట్రాలకు వలస వెళ్తున్నారు.

తెలంగాణ ప్రభుత్వం ప్రైవేట్ విశ్వవిద్యాలయాలకు తెరతీసే ముందు ప్రస్తుతం నడుస్తున్న విశ్వవిద్యాలయాలను బాగు చేయాలి. ‘ఉట్టికి ఎక్కలేనమ్మ స్వర్గానికి ఎక్కుతాన’ని అన్నట్టు ఉంది..కెసిఆర్ ప్రభుత్వ వ్యవహారం. ప్రభుత్వ నేతృత్వంలోని యూనివర్సిటీలను పటిష్టం చేసి, సమాజంలో పోటీకి సిద్ధం చేసి, ప్రైవేట్ యూనివర్సిటీల గురించి ఆలోచిస్తే బాగుండేది.

ప్రైవేట్ యూనివర్శిటీలకు ఆంధ్ర, తెలంగాణ రాష్ట్రాలే కాకుండా దేశంలోని అన్ని రాష్ట్రాలు పోటీలు పడి భూములు కేటాయిస్తున్నాయి. దీనివల్ల విద్యా రంగం నిర్వీర్యమవుతుంది. విద్యారంగం ఎప్పుడూ ప్రభుత్వ పరిధిలోనే ఉండాలి. కాని ప్రైవేట్ విశ్వవిద్యాలయాలకు ఎడాపెడా అనుమతులు ఇవ్వడంవల్ల సామాజిక సంక్షేమం, సమతుల్యత దెబ్బతింటుంది. భవిష్యత్తులో అస్తవ్యస్త పరిస్థితులు తలెత్తి, అశాంతికి కారణమవుతుంది.

తెలంగాణ రాష్ట్రం ఏర్పడిన తొలి క్షణం నుండి పేద, బడుగు, బలహీన వర్గాల విద్యార్ధులంతా తమకు ఉన్నత విద్య దొరుకుతుందని భావించారు. తాముకూడా ఉన్నత విద్యకు అర్హులం అవుతామని కలలు కన్నారు. ఆ సమయంలోనే కెజి నుండి పిజి వరకూ ఉచిత విద్య తీసుకువస్తామని ప్రభుత్వం ప్రకటించగానే విద్యార్ధులు, యువకులు, కార్మికులు, రైతులు, కర్షకులు సైతం ఆనందం వ్యక్తం చేశారు.