చెన్నై, నవంబర్ 17: తమిళనాడు ముఖ్యమంత్రి జయలలిత వేగంగా కోలుకుంటున్నారు. శ్వాసకోస సంబధిత వ్యాధి నుంచి జయలలిత పూర్తిగా కోలుకున్నారని, సొంతంగానే శ్వాస తీసుకోగలుగుతున్నారని అధికార అన్నాడిఎంకె వర్గాలు తెలిపాయి. ఈ నేపథ్యంలో ఆమెను ఏ రోజైనా అపోలో ఆసుపత్రి నుంచి డిశ్చార్జిచేసే అవకాశం ఉందని పార్టీ ప్రతినిధి సి పొన్నయ్యన్ తెలిపారు. సెప్టెంబర్ 22 నుంచి ఇదే ఆసుపత్రిలో జయ చికిత్సపొందుతున్నారు.

న్యూఢిల్లీ, నవంబర్ 17: స్వచ్ఛ భారత్ అవగాహన ప్రచారంలో హైదరాబాద్ మూడో స్థానంలో నిలిచింది. తిరుపతికి ఎనిమిదో స్థానం దక్కింది. గురువారంనాడు స్వచ్ఛ భారత్ అవగాహన ప్రచారంలో ముందున్న పది పట్టణాల జాబితాను కేంద్ర పట్టణాభివృద్ధిశాఖ విడుదల చేసింది. స్వచ్ఛ భారత్ అవగాహన ప్రచారంలో దేశ వ్యాప్తంగా 500 పట్టణాల్లో ఉత్తరప్రదేశ్‌లోని ఆలీగఢ్ ప్రథమ స్థానంలో నిలిచింది.

హైదరాబాద్, నవంబర్ 17: పెద్ద నోట్లు రద్దయి పది రోజులు గడిచినా సామాన్యుల కష్టాలకు అంతూ పొంతూ లేకపోవడంతో కేంద్రం మరో వెసులుబాటు కల్పించింది. కొత్త నోట్లకు తగ్గట్టుగా ఏటిఎమ్‌లు సాంకేతికంగా సిద్ధం కాకపోవడంతో ఇక పెట్రోలు బంకుల్నే ఎటిఎమ్ కేంద్రాలుగా మార్చాలని నిర్ణయించింది. ఆ విధంగా ఎటిఎమ్‌లు, బ్యాంకులపై వత్తిడి తగ్గించే యోచన చేసింది.

న్యూఢిల్లీ, నవంబర్ 17: దేశవ్యాప్తంగా పెద్దనోట్ల రద్దుపై పశ్చిమ బెంగాల్ ముఖ్యమంత్రి మమతా బెనర్జీ, ఢిల్లీ ముఖ్యమంత్రి అరవింద్ కేజ్రీవాల్ గురువారం కేంద్రానికి అల్టిమేటం జారీ చేశారు. రద్దు నిర్ణయాన్ని మూడు రోజుల్లో వాపస్ తీసుకోకపోతే దేశవ్యాప్తంగా ప్రభుత్వంపై తిరుగుబాటు వస్తుందని హెచ్చరించారు. వారిద్దరూ గురువారం రిజర్వ్ బ్యాంక్‌ను సందర్శించి కొత్త నోట్ల ప్రింటింగ్ పరిస్థితిని సమీక్షించి వచ్చారు.