తిరుమల, అక్టోబర్ 16: కలియుగ ప్రత్యక్షదైవం శ్రీ వేంకటేశ్వర స్వామి ఆదివారం పౌర్ణమి సందర్భంగా పున్నమి వెలుగుల్లో గరుడ వాహనంపై విహరించి భక్తులకు కనువిందుచేశారు. రాత్రి 7 నుంచి 9 గంటల మధ్యన మేళతాళాలు, మంగళవాయిద్యాలు, వేదమంత్రోచ్ఛారణల నడుమ శ్రీవారి పున్నమి గరుడ సేవ అత్యంత వైభవోపేతంగా జరిగింది. మలయప్పస్వామి సర్వాలంకార భూషితుడై సువర్ణునిపై విహరించిన వైనాన్ని తిలకించిన భక్తులు పునీతులయ్యారు.

శ్రీకాళహస్తి, అక్టోబర్ 16: తమిళనాడు సిఎం డాక్టర్ జయలలిత ఆరోగ్యం కుదుటపడాలని కోరుతూ శ్రీ కాళహస్తిలో ఆదివారం మహా మృత్యుంజయ యాగం జరిగింది. రాష్ట్ర ప్రభుత్వం సూచన మేరకు శ్రీకాళహస్తి దేవస్థానం ట్రస్టుబోర్డు అధ్యక్షుడు గురవయ్యనాయుడు భరద్వాజ తీర్థంలో యాగాన్ని జరిపించారు. దేవస్థానం పూజారులు, వేద పండితులు వేదమంత్రాలతో యాగాన్ని నిర్వహించారు. అనారోగ్యం నుంచి జయలలిత త్వరగా కోలుకోవాలని ప్రార్థించారు.

హైదరాబాద్, అక్టోబర్ 16: గన్నవరం విమానాశ్రయం విస్తరణలో భాగంగా నాలుగు గ్రామాల్లో భూసేకరణ నిమిత్తం ఆంధ్రప్రదేశ్ ప్రభుత్వం రూ.24 కోట్లను విడుదల చేసింది. ఈ మేరకు జీవో జారీ చేసింది. అజ్జంపూడి, అల్లాపురం, బుద్ధవరం, కీసరపల్లి గ్రామాల్లో రైతుల పౌల్ట్రీ షెడ్లు, నిర్మాణాలు, చెట్లు, డ్రిప్ ఇరిగేషన్ వ్యవస్థ, కొన్ని భూములు సేకరించాలని ఇంధన, వౌలిక సదుపాయాల శాఖ నిర్ణయించింది.

తెనాలి, అక్టోబర్ 16: రాడికల్ యువజన సంఘం రాష్ట్ర తొలి అధ్యక్షుడు, విరసం మాజీ సభ్యుడు విజె వర్ధనరావు (70) గుంటూరు జిల్లా తెనాలిలోని తన నివాసంలో శనివారం అర్ధరాత్రి హఠాన్మరణం చెందారు. విఎస్‌ఆర్ అండ్ ఎన్‌విఆర్ కళాశాల అధ్యాపకునిగా ఆయన పనిచేశారు. మరోవైపు విప్లవోద్యమంలో ఎందరో యువకులను రాజకీయ శిక్షణ తరగతుల ద్వారా ఉద్యమ పథాన నడిపించారు. అనేక సార్లు అరెస్ట్‌లు, వేధింపులతో జైలు జీవితం గడిపారు.