విశాఖ: హాస్టళ్లలోని మెస్‌లలో నాణ్యత లేని ఆహారం పెడుతున్నారని ఆరోపిస్తూ ఎయు విద్యార్థులు శుక్రవారం నాడు రిజిస్ట్రార్ కార్యాలయం వద్ద ధర్నా చేపట్టారు. తమ సమస్యలను వార్డెన్లు పట్టించుకోవడం లేదని వారు ఆగ్రహం వ్యక్తం చేస్తున్నారు. నాణ్యమైన ఆహారం అందించే వరకూ తమ ఆందోళన కొనసాగుతుందని వారు ప్రకటించారు.

కాకినాడ: గోదావరి నదిలో వరద ఉద్ధృతి తగ్గడంతో లంక గ్రామాలు సాధారణ స్థితికి చేరుకుంటున్నాయి. వరద నీటి ప్రవాహంతో గత నాలుగురోజులుగా లంక గ్రామాల ప్రజలు భయంతో గడిపారు. శుక్రవారం ఉదయం ధవలేశ్వరం వద్ద గోదావరి నీటి మట్టం 11 అడుగులకు తగ్గింది. నీటి ప్రవాహం తగ్గడంతో విలీన మండలాల్లో విద్యుత్‌ను పునరుద్ధరించేందుకు అధికారులు రంగంలోకి దిగారు.

గుంటూరు: కుటుంబ కలహాల నేపథ్యంలో భార్యను చంపి భర్త ఆత్మహత్య చేసుకున్న విషాద ఘటన తెనాలి మండలం చినరావూరులో శుక్రవారం వెలుగు చూసింది. బాలాజీ, జ్యోతి దంపతుల మధ్య కొన్నాళ్లుగా కుటుంబ కలహాలు చోటుచేసుకున్నాయి. దీంతో విసుగెత్తిన బాలాజీ గురువారం రాత్రి జ్యోతిని హతమార్చి తాను ఆత్మహత్య చేసుకున్నాడు. శుక్రవారం ఉదయం వీరి మృతదేహాలను స్థానికులు కనుగొని పోలీసులకు ఫిర్యాదు చేశారు.

విజయవాడ, జూలై 14: బందరు పోర్టు నిర్మాణానికి భారీ ఎత్తున భూమిని సేకరించాలన్న ప్రభుత్వ నిర్ణయంపై సర్వత్రా విమర్శలు వ్యక్తం అవుతున్నాయి. పోర్టు నిర్మాణానికి, పోర్టు ఆథారిత పరిశ్రమల కారిడార్ కోసం ప్రభుత్వం 10 వేల ఎకరాలకుతోడు, రైతుల నుంచి 20 వేల ఎకరాల భూమిని సమీకరించాలని ప్రభుత్వం నోటిఫికేషన్ జారీ చేసింది. రెండు వారాల్లోగా ఈ ప్రక్రియ పూర్తి కావాలని అధికార యంత్రాంగాన్ని ప్రభుత్వం ఆదేశించింది.