విజయవాడ, జూలై 15: నవ్యాంధ్ర రాజధానికి రావాల్సిన నిధులు, హైకోర్టు విభజన, అంతర్రాష్ట్ర జలవివాదాలు, రైల్వే జోన్, వెనుకబడిన జిల్లాల అభివృద్ధికి ప్రత్యేక నిధులు వంటి అంశాలకు పార్లమెంటు సమావేశాల్లో ప్రాధాన్యం ఇవ్వాలని సిఎం చంద్రబాబు పేర్కొన్నారు. వివాదాలకు, విమర్శలకు తావివ్వకుండా మిత్రపక్షమైన బిజెపి మద్దతుతో సమస్యల పరిష్కారానికి సమన్వయంతో పని చేయాలని పిలుపునిచ్చారు.

చింతూరు, జూలై 15: తూర్పు గోదావరి జిల్లా ఏజెన్సీ ప్రాంతంలో మావోయిస్టులు అమర్చిన రెండు మందుపాతరలను పోలీసులు గుర్తించి, పేల్చివేశారు. చింతూరు మండలం ఏడు గుర్రాలపల్లి, పేగ గ్రామాల మధ్య చెట్ల కింద మావోయిస్టులు మందుపాతరలు అమర్చారు. శుక్రవారం పోలీసులు కూంబింగ్ సమయంలో ఈ మందుపాతరలను గుర్తించారు. ప్రతి శుక్రవారం ఏడుగుర్రాలపల్లి గ్రామంలో వారాంతపు సంత జరుగుతుంది. ఈ సంతను పోలీసులు తమ అధీనంలోకి తీసుకుంటారు.

విజయవాడ, జూలై 15: మరో 28 రోజుల్లో కృష్ణా పుష్కరాలు సమీపిస్తున్నందున అధికారులు ఇప్పటినుంచే అప్రమత్తమై సన్నద్ధంగా ఉండాలంటూ శుక్రవారం రాత్రి సిఎం క్యాంపు కార్యాలయంలో జరిగిన కృష్ణా, గుంటూరు జిల్లాల అధికారుల సమీక్ష సమావేశంలో ముఖ్యమంత్రి చంద్రబాబు ఆదేశాలు జారీ చేశారు. ప్రధానంగా పోలీసు, రెవెన్యూ యంత్రాంగాలు సమన్వయంతో పనిచేసి సకాలంలో పనులు పూర్తయ్యేలా చూడాలన్నారు.

విజయవాడ, జూలై 15: రాష్ట్రంలో ప్రాథమిక, మాధ్యమిక ఆరోగ్య విభాగాల్లో కలిసి పనిచేయడానికి బిల్‌గేట్స్ ఫౌండేషన్ ఆసక్తి కనబరుస్తోంది. అలాగే వ్యవసాయాన్ని లాభసాటిగా మార్చుకునేందుకు ఆ రంగంలో సాంకేతికతను వినియోగించుకునే విషయంలో పూర్తి సహకారం అందించేందుకు కూడా అంగీకారం తెలిపింది. సిఎం చంద్రబాబు శుక్రవారం రాత్రి తన క్యాంపు కార్యాలయం నుంచి ఫౌండేషన్ ప్రతినిధులతో టెలికాన్ఫరెన్స్ నిర్వహించారు.