హైదరాబాద్, జూలై 14: ఆంధ్రప్రదేశ్‌లో ప్రభుత్వ పాఠశాలలను మరింత బలోపేతం చేసేందుకు, విద్యార్ధుల తల్లిదండ్రులు, ఇతర స్థానిక ప్రతినిధులను మరింత భాగస్వామ్యం చేసేందుకు రాష్ట్ర వ్యాప్తంగా ఉన్న అన్ని పాఠశాలల్లో స్కూల్ మేనేజిమెంట్ కమిటీలకు ఎన్నికలు నిర్వహిస్తున్నట్టు రాష్ట్ర మానవ వనరుల మంత్రి గంటా శ్రీనివాసరావు చెప్పారు.

కర్నూలు, జూలై 14: మాజీ మంత్రి, సీనియర్ కాంగ్రెస్ నాయకుడు బైరెడ్డి శేషశయనారెడ్డి (85) గురువారం రాత్రి మృతి చెందారు. ఆయన తన స్వగ్రామమైన కర్నూలు జిల్లా పగిడ్యాల మండలం ముచ్చుమర్రి గ్రామంలో నివసిస్తున్నారు. గురువారం రాత్రి తీవ్ర అస్వస్థతకు గురికావడంతో కర్నూలుకు తరలిస్తుండగా మార్గమధ్యంలో మృతి చెందారు. ఆయనకు నలుగురు సంతానం.

హైదరాబాద్, జూలై 14: తాను ఎన్నికల్లో పోటీ చేసినప్పుడు ఖర్చు ఎక్కువైందంటూ ఏపి స్పీకర్ డాక్టర్ కోడెల శివప్రసాదరావు ఒక టీవీ చానల్‌కు ఇచ్చిన ఇంటర్వ్యూపై ఎన్నికల సంఘం స్పందించింది. ఈ విషయమై వైకాపా నేత అంబటి రాంబాబు ఎన్నికల సంఘానికి ఫిర్యాదు చేశారు. ఈ విషయమై స్పీకర్ చేసినట్లుగా ఉన్న వ్యాఖ్యలు ఉన్న వీడియో దృశ్యాలను తమకు సమర్పించాలని రాష్ట్ర ఎన్నికల ప్రదానాధికారి ఒక టీవీ చానల్‌కు నోటీసు జారీ చేశారు.

మంగళగిరి, జూలై 14: షోరూంకే రాని వాహనాలను గుంటూరు జిల్లా మంగళగిరిలోని మోటారు వాహన ఇన్‌స్పెక్టర్ శివనాగేశ్వరరావు అక్రమంగా రిజిస్ట్రేషన్ చేసిన అంశం వెలుగు చూడటంతో ప్రభుత్వం సమగ్ర విచారణకు ఆదేశించినట్లు తెలిసింది. 27 సరుకు రవాణా వాహనాలకు రిజిస్ట్రేషన్ చేసినట్లు తేలింది.