పార్వతీపురం, జూలై 14: సర్దార్ గౌతులచ్చన్న బ్యారేజి ప్రాజెక్టు (తోటపల్లి రిజర్వాయర్ ) ద్వారా లక్ష ఎకరాలకు సాగునీరందించే కార్యక్రమాన్ని గురువారం రాష్ట్ర నీటి పారుదల శాఖామంత్రి దేవినేని ఉమామహేశ్వరరావు ప్రారంభించారు. గురువారం ప్రాజెక్టు పరిధిలోని ఉల్లిభద్ర వద్ద ప్రాజెక్టు కుడి ప్రధాన కాలువ నుంచి స్విచ్ ఆన్ చేసి మంత్రి నీటిని విడుదల చేశారు.

హైదరాబాద్, జూలై 14: రాష్ట్రంలో ఏడు ప్రముఖ దేవాలయాల్లో కూడా విద్యుత్ ఆదా కోసం ఎనర్జీ ఎఫిషియెంట్ ఎండోమెంట్స్ ప్రాజెక్టు స్కీంను అమలు చేయాలని ఏపి ట్రాన్స్‌కో నిర్ణయించింది. దీని వల్ల సాలీనా 60 లక్షల విద్యుత్ యూనిట్లను పొదుపు చేయవచ్చని ఇంధన శాఖ కార్యదర్శి అజయ్ జైన్ తెలిపారు.

కర్నూలు సిటీ, జూలై 14: రాష్ట్రంలో భూములకు సంబంధించిన రికార్డుల పరిరక్షణకు రూ. 872కోట్లు కేటాయించామని ఉప ముఖ్యమంత్రి కెఇ కృష్ణమూర్తి తెలిపారు. కర్నూలు నగరంలోని ప్రభుత్వ అతిథి గృహంలో గురువారం ఆయన విలేఖరులతో మాట్లాడుతూ భూముల రీ సర్వే చేయించి వాటికి సంబంధించిన రికార్డులను భద్రపరుస్తామన్నారు. అందుకోసం మొదటి విడతగా 384 డేటాబేస్ సెంటర్లు, రెండవ విడతగా 452 సెంటర్లు ఏర్పాటు చేశామన్నారు.

బొబ్బిలి(రూరల్), జూలై 14: ఏమాత్రం సర్వీస్ లేని 32 విమానాశ్రయాలపై దృష్టి సారించామని కేంద్ర పౌర విమానయాన శాఖామంత్రి పూసపాటి అశోక్‌గజపతిరాజు పేర్కొన్నారు. విజయనగరం జిల్లా బొబ్బిలికి గురువారం వచ్చిన ఆయన విలేఖర్ల సమావేశంలో మాట్లాడుతూ అందరికీ అందుబాటులో ఉండే విధంగా విమాన టికెట్ల ధరలను ప్రవేశపెట్టనున్నట్టు తెలిపారు. 2వేల 500 రూపాయలతో విమానం ఎక్కే విధంగా చర్యలు చేపడుతున్నామన్నారు.