హైదరాబాద్: ఆమరణ దీక్ష చేస్తున్న కాపు ఉద్యమనేత ముద్రగడ పద్మనాభంపైన, ఆయన కుటుంబ సభ్యులపైన సిఎం చంద్రబాబు ఒత్తిడితో పోలీసులు దౌర్జన్యం చేశారని వైకాపా అధినేత వైఎస్ జగన్ శుక్రవారం ఇక్కడ మీడియాతో అన్నారు. సిఎం దారుణంగా ప్రవర్తిస్తున్నందున అన్ని వర్గాల వారూ తీవ్రంగా నిరసించాలని ఆయన విజ్ఞప్తి చేశారు. ఎపిలో సాక్షి టీవీ చానల్ ప్రసారాలను నిలిపివేయడం చంద్రబాబు నియంతృత్వానికి పరాకాష్ట అన్నారు.

నెల్లూరు: కోవూరు మండలం కొత్తూరు వద్ద ఓ రైస్‌మిల్లు శుక్రవారం ఉదయం అగ్నిప్రమాదంలో పూర్తిగా దగ్ధమైంది. సుమారు 80 లక్షల రూపాయల మేరకు ఆస్తినష్టం జరిగిందని ప్రాథమిక అంచనా. ధాన్యం, బియ్యం నిల్వలతోపాటు మిల్లులోని యంత్రాలు అగ్నికి ఆహుతయ్యాయి.

విజయవాడ: వీరులపాడు మండలం పెద్దాపురం చెక్‌పోస్టు వద్ద పోలీసులు శుక్రవారం ఉదయం తనిఖీలు చేసి 50 క్వింటాళ్ల రేషన్ బియ్యం స్వాధీనం చేసుకున్నారు. రెండు వాహనాలను సీజ్ చేసి, ఇద్దరు నిందితులను అరెస్టు చేశారు.

అనంతపురం : ఎస్కే యూనివర్సిటీ నిర్వహించిన ఏపీ లాసెట్‌ - 2016 ప్రవేశ పరీక్ష ఫలితాలు శుక్రవారం విడుదలయ్యాయి. రాష్ట్ర ఐటీ శాఖమంత్రి పల్లె రఘునాథరెడ్డి, ఉన్నత విద్యామండలి ఛైర్మన్‌ వేణుగోపాల్‌రెడ్డి, ఎస్కేయూ ఉపకులపతి రాజగోపాల్‌, ఏపీ లాసెట్‌ కన్వీనర్‌ పుల్లారెడ్డి ఫలితాలను విడుదల చేశారు. 3 ఏళ్లు, 5ఏళ్ల ఎల్‌ఎల్‌బీ కోర్సులతో పాటు పీజీఎఎల్‌ఎం ప్రవేశ పరీక్షకు 10,499మంది విద్యార్థులు హాజరయ్యారు.