ముంబయి, ఏప్రిల్ 21: దేశీయ ప్రైవేట్‌రంగ బ్యాంకుల్లో రెండో అతిపెద్ద బ్యాంకైన హెచ్‌డిఎఫ్‌సి బ్యాంక్ నికర లాభం గత ఆర్థిక సంవత్సరం (2016-17) చివరి త్రైమాసికం (జనవరి-మార్చి)లో 3,990 కోట్ల రూపాయలుగా నమోదైంది. అంతకుముందు ఆర్థిక సంవత్సరం (2015-16) జనవరి-మార్చితో పోల్చితే ఇది 18.3 శాతం అధికం. ఇక గత ఆర్థిక సంవత్సరం మొత్తంగా బ్యాంక్ నికర లాభం 15,253 కోట్ల రూపాయలుగా ఉంది.

ముంబయి, ఏప్రిల్ 20: త్రైమాసిక ఫలితాలు వెలువడుతుండడం, అంతర్జాతీయ పరిణామాల నేపథ్యంలో నాలుగు రోజులుగా నష్టాల్లో కొనసాగుతూ వచ్చిన దేశీయ స్టాక్ మార్కెట్లు గురువారం లాభాల్లో ముగిశాయి. ఆసియా మార్కెట్లలో సానుకూల ధోరణులు కూడా మదుపరుల కొనుగోళ్లకు ఊతమివ్వడంతో బిఎస్‌ఇ సెనె్సక్స్ 86 పాయింట్లు లాభపడగా, నేషనల్ స్టాక్ ఎక్స్‌చేంజి సూచీ నిఫ్టీ దాదాపు 332 పాయింట్లు లాభపడింది.

న్యూఢిల్లీ, ఏప్రిల్ 20: దేశంలో మూడవ అతిపెద్ద సాఫ్ట్‌వేర్ సేవల సంస్థ అయిన విప్రో తమ ఉద్యోగులకు భారీ షాక్ ఇవ్వడానికి సిద్ధమయింది. తమ ఉద్యోగుల ‘ప్రతిభా మదింపు’ తర్వాత వందలాది మందికి ఉద్వాసన పలకడానికి రంగం సిద్ధం చేసుకున్నట్లు తెలుస్తోంది. కంపెనీ దాదాపు 600 మంది ఉద్యోగులకు ఉద్వాసన పలకనున్నట్లు విశ్వసనీయ వర్గాలు చెప్తున్నప్పటికీ ఈ సంఖ్య 2 వేల వరకూ పెరగవచ్చని తెలుస్తోంది.

న్యూఢిల్లీ, ఏప్రిల్ 20: గత (2016-17) ఆర్థిక సంవత్సరానికి గాను ఇపిఎఫ్ డిపాజిట్లపై 8.65 శాతం వడ్డీ చెల్లించేందుకు ఆర్థిక మంత్రిత్వ శాఖ ఆమోదం తెలిపిందని కేంద్ర కార్మిక శాఖ మంత్రి బండారు దత్తాత్రేయ గురువారం వెల్లడించారు. ఇపిఎఫ్ డిపాజిట్లపై 8.65 శాతం వడ్డీ చెల్లించాలని ఉద్యోగ భవిష్య నిధి సంస్థ (ఇపిఎఫ్‌ఓ) ట్రస్టు బోర్డు సభ్యులు గత ఏడాది డిసెంబర్‌లో నిర్ణయించిన విషయం తెలిసిందే.