విజయవాడ, సెప్టెంబర్ 12: రాష్ట్రంలో లక్ష్యాలకు మించి శ్రీనిధి రుణాలు ఇచ్చారు. పేద మహిళలు జీవనోపాధి ద్వారా ఆర్థికాభివృద్ధి సాధించేందుకు ఈ పథకాన్ని ప్రవేశపెట్టారు. నిరుపేద మహిళలు వడ్డీ వ్యాపారుల బారినపడకుండా తమ కాళ్ల మీద తాము నిలబడే విధంగా ఈ పథకం ఉపయోగపడుతోంది. స్వయం సహాయక బృందాలకు ఈ పథకం ఓ వరంగా నిలిచింది. పాడి పశువుల కొనుగోలుకు, చిరు వ్యాపారం వంటి వాటికి రూ.75 వేల వరకు రుణం ఇస్తారు.

న్యూఢిల్లీ, సెప్టెంబర్ 12: ఎక్సైజ్ పన్నుల వసూళ్లు పెరగడంతో దేశంలో ఈ ఏడాది ఏప్రిల్ నుంచి ఆగస్టు వరకు పరోక్ష పన్నుల నికర వసూళ్లు 27.5 శాతం పెరిగి 3.36 లక్షల కోట్ల రూపాయలకు చేరుకున్నాయి. దీంతో వార్షిక బడ్జెట్‌లో కేంద్ర ప్రభుత్వం లక్ష్యంగా నిర్దేశించుకున్న సెంట్రల్ ఎక్సైజ్ సుంకం, సేవా పన్ను, కస్టమ్స్ సుంకాలు సహా పరోక్ష పన్ను వసూళ్ల మొత్తంలో ఆగస్టు వరకు 43.2 శాతం వసూళ్లు జరిగినట్లు స్పష్టమవుతోంది.

న్యూఢిల్లీ, సెప్టెంబర్ 12: షిప్పింగ్ కార్పొరేషన్ ఆఫ్ ఇండియా (ఎస్‌సిఐ) చైర్మన్, మేనేజింగ్ డైరెక్టర్ (సిఎండి)గా అనూప్ కుమార్ శర్మ బాధ్యతలు చేపట్టారు. సోమవారం నుంచి మూడేళ్ల పాటు ఆయన ఈ పదవిలో కొనసాగుతారని ఎస్‌సిఐ బాంబే స్టాక్ ఎక్స్‌చేంజికి తెలియజేసింది. షిప్పింగ్ కార్పొరేషన్ మన దేశ ప్రధాన నౌకా రవాణా సంస్థగా కొనసాగుతున్న విషయం తెలిసిందే.

న్యూఢిల్లీ, సెప్టెంబర్ 12: పప్పు ధాన్యాలను సాగు చేసేలా రైతులను ప్రోత్సహించి దేశంలో ధరల పెరుగుదలను అదుపు చేయాలని భావిస్తున్న కేంద్ర ప్రభుత్వం పప్పుదినుసుల మిగులు నిల్వ పరిమితిని ప్రస్తుతమున్న 8 లక్షల టన్నుల నుంచి 20 లక్షల టన్నులకు పెంచాలని సోమవారం నిర్ణయించింది.