హైదరాబాద్, జనవరి 21: సెంట్రల్ యూనివర్సిటీ ఎబివిపికి అడ్డాగా మారిందని ఎఐసిసి నాయకుడు, రాజ్యసభ సభ్యుడు వి.హనుమంత రావు విమర్శించారు. దేశంలోని అన్ని వర్సిటీల్లో ఎబివిపిని కేంద్ర ప్రభుత్వం ప్రోత్సహిస్తున్నదని ఆయన ఆరోపించారు. సెంట్రల్ వర్సిటీలో దళిత విద్యార్థులు చేస్తున్న దీక్షా శిబిరానికి ఎబివిపి తప్ప అన్ని విద్యార్థి సంఘాలు వెళ్లి మద్దతు ప్రకటించాయని ఆయన గురువారం విలేఖరుల సమావేశంలో చెప్పారు.

ఖానాపురం హవేలి, జనవరి 21: హైదరాబాద్ సెంట్రల్ యూనివర్సిటీలో ఆత్మహత్య చేసుకున్న రోహిత్‌ది ముమ్మాటికి రాజకీయ హత్యేనని సిపిఎం జిల్లా కార్యదర్శి పోతినేని సుదర్శన్‌రావు పేర్కొన్నారు. గురువారం ఖమ్మంలో ఎస్‌ఎఫ్‌ఐ, కెవిపిఎస్ ఆధ్వర్యంలో జరిగిన చర్చా వేదికలో ఆయన మాట్లాడుతూ రోహిత్ ఉదంతం విద్యాసంస్థల్లో దళిత విద్యార్థుల పట్ల ఉన్న వివక్షతను తెలియ చేస్తుందన్నారు.

న్యూఢిల్లీ, జనవరి 21: తెలంగాణకు సంబంధించిన పలు పథకాలను రానున్న రైల్వే బడ్జెట్‌లో చేర్చాలని కాంగ్రెస్ రాజ్యసభ సభ్యుడు ఆనంద భాస్కర్ రైల్వే శాఖ మంత్రి సురేష్ ప్రభుకు విజ్ఞప్తి చేశారు. ఆనంద్ భాస్కర్ గురువారం సురేష్ ప్రభును కలిసి ఈ మేరకు ఒక వినతిపత్రం అందజేశారు. స్టేషన్ ఘనపుర్-సూర్యాపేట్ రైల్వే లైను నిర్మాణానికి అదనపు నిధులు కేటాయించాలన్నారు.

ఖమ్మం(కల్చరల్), జనవరి 21: హస్త కళలు దేశ సంస్కృతి, సాంప్రదాయాలకు ప్రతీకలని ఖమ్మం శాసనసభ్యుడు పువ్వాడ అజయ్‌కుమార్ అన్నారు. గురువారం స్థానిక టిటిడిసి భవన్‌లో కళాభారతి ఆధ్వర్యంలో ఏర్పాటు చేసిన హస్త, చేనేత కళా ప్రదర్శనకు ఆయన ముఖ్యఅతిధిగా జ్యోతిప్రజ్వలన చేసి ప్రారంభించారు. ఈ సందర్భంగా ఆయన మాట్లాడుతూ ఇతర దేశాల్లో మన దేశ సంస్కృతి, సాంప్రదాయాలకు ప్రత్యేకమైన గుర్తింపు ఉందన్నారు.