న్యూ ఢిల్లీ, జూన్ 28: ఎన్నికల సమయంలో పోలింగ్‌కు 48 గంటలకు ముందు రాజకీయ పార్టీల ప్రచార ప్రకటనలను నిలిపివేసే విషయమై పరిశీలించాలన్న కేంద్ర ఎన్నికల సంఘం వినతిని ఫేస్‌బుక్ పరిశీలిస్తోంది. కాని ఈ అంశంపై మాత్రం ఇంతవరకు స్పందించలేదు. రాజకీయ పార్టీలు ఎన్నికల సమయంలో సామాజిక మాద్యమాలను విచ్చలవిడిగా ఉపయోగించుకుంటున్న విషయం విదితమే.

పురులియా, జూన్ 28: పశ్చిమ బెంగాల్‌లో ముఖ్యమంత్రి మమతాబెనర్జీ ప్రభుత్వం రాజకీయ ప్రత్యర్థులపై దాడులకు పాల్పడుతున్నారని బీజేపీ జాతీయ అధ్యక్షుడు అమిత్‌షా తీవ్ర ఆరోపణలు చేశారు. గురువారం నాడిక్కడ ఓ బహిరంగ సభలో మాట్లాడిన అమిత్‌షా తృణమూల్ కాంగ్రెస్ ప్రభుత్వంపై నిప్పులు చెరిగారు. బీజేపీ కార్యకర్తల తాగ్యాలు వృధా పోవని వచ్చే లోక్‌సభ ఎన్నికల్లో 22 స్థానాలు గెలుచుకుంటామని షా ధీమా వ్యక్తం చేశారు.

న్యూఢిల్లీ, జూన్ 28: రెండేళ్ల క్రితం పాక్‌లోని ఉగ్రవాదులపై జరిపిన సర్జికల్ స్ట్రైక్ వీడియోలను విడుదల చేసిన బీజేపీ ప్రభుత్వం దానిని రాజకీయం చేస్తోందని, దేశం కోసం సైనికులు చిందించిన రక్తాన్ని, త్యాగాన్ని, ధైర్య సాహసాలను రాజకీయ ఓటు కోసం ఆయుధంగా మలచుకోవద్దని కాంగ్రెస్ అధికార ప్రతినిధి రణదీప్ సుర్జేవాలా పేర్కొన్నారు.

న్యూఢిల్లీ, జూన్ 28: కాలనీల అభివృద్ధి పేరుతో నగరంలోని వేలాది చెట్లను కొట్టివేస్తున్నారంటూ కేంద్ర పర్యావరణ మంత్రి హర్షవర్ధన్ ప్రజలను తప్పుదోవపట్టిస్తున్నారని ఆమ్ ఆద్మీ పార్టీ ఆరోపించింది. ఏడు కాలనీల్లో రాష్ట్ర ప్రభుత్వం 16,500 చెట్లు నరికివేయడానికి ప్రయత్నిస్తోందని మంత్రి అవాస్తవాలు ప్రచారం చేస్తున్నారని ఆప్ అధికార ప్రతినిధి సౌరభ్ భరద్వాజ్ విమర్శించారు.