న్యూఢిల్లీ, జనవరి 30: ప్రభుత్వంలోని వివిధ విభాగాల్లో ఐదేళ్లకు పైగా ఖాళీగా ఉన్న పోస్టులను రద్దుచేయనున్నారు. ఈ మేరకు సమగ్ర నివేదిక ఇవ్వాలని అన్ని మంత్రిత్వశాఖలను కేంద్రం ఆదేశించింది.

శ్రీనగర్, జనవరి 29: జమ్మూకాశ్మీర్‌లోని అమర్‌నాథ్ యాత్రికులపై దాడి కేసుకు సంబంధించి 11 మంది లష్కరే తోయిబా ఉగ్రవాదులపై పోలీసులు సోమవారం చార్జిషీట్ దాఖలు చేశారు. 2017 జూలైలో జరిగిన ఉగ్రదాదిలో ఎనిమిది మంది యాత్రికులు మృతి చెందారు. రణ్‌బీర్ పీనల్‌కోడ్ కింద (ఐపీసీ లాంటిదే) వివిధ సెక్షన్లు నిందితులపై పెట్టారు.

బహరాంపూర్, జనవరి 29: పశ్చిమ బెంగాల్‌లోని ముర్షిదాబాద్‌లో ప్రయాణికుల బస్సు కాల్వలోకి బోల్తాపడ్డ ఘటనలో 36 మంది మృతి చెందారు. ఘోగ్రా వద్ద వంతెన రైలింగ్‌ను ఢీకొని బస్సు కాల్వలో పడిపోయింది. దుర్ఘటనలో 36 మంది మృతి చెందగా, వారిలో ఇద్దరు చిన్నారులున్నారు. సమాచారం తెలిసినా పోలీసులు సంఘటనా స్థలానికి సకాలంలో చేరుకోలేదని స్థానికులు పెద్దఎత్తున ఆందోళనకు దిగారు.

న్యూఢిల్లీ, జనవరి 29: దేశంలో తొమ్మిది ఎన్నికల ట్రస్టుల నుంచి రాజకీయ పార్టీలకు 637.54 కోట్ల రూపాయలు విరాళాలు అందాయి. 2013-14,2016-17 కాలంలో అత్యధికంగా భారతీయ జనతా పార్టీ (బీజేపీ) ఒక్క పార్టీకే 488.94 కోట్ల రూపాయలు వచ్చాయి. కాంగ్రెస్‌కు 86.65 కోట్ల రూపాయల విరాళంగా దక్కాయని అసోసియేషన్ ఫర్ డెమోక్రటిక్ రిఫామ్స్ (ఏడీఆర్) సోమవారం ఇక్కడ వెల్లడించింది.