ముంబయి, సెప్టెంబర్ 21: బిసిసిఐ కార్యదర్శిగా 62 ఏళ్ల అజయ్ షిర్కే ఏకగ్రీవంగా ఎన్నికయ్యాడు. బుధవారం ఇక్కడ జరిగిన 87వ వార్షిక సర్వసభ్య సమావేశం అజెండాలో ఇదే కీలకాంశం. అంతర్జాతీయ క్రికెట్ మండలి (ఐసిసి) చైర్మన్‌షిప్ కోసం బోర్డు అధ్యక్ష పదవికి శశాంక్ మనోహర్ రాజీనామా చేయడంతో, అతని స్థానంలో, ఈ ఏడాది జూలై మాసంలో అనురాగ్ ఠాకూర్ అధ్యక్షుడిగా బాధ్యతలు స్వీకరించాడు.

న్యూఢిల్లీ, సెప్టెంబర్ 21: భారత మహిళల హాకీ జట్టు మాజీ కెప్టెన్ రీతూ రాణి కెరీర్‌కు గుడ్‌బై చెప్పింది. రియో ఒలింపిక్స్‌కు ఎంపిక చేయకపోవడం ఆమెను మానసికంగా కుంగతీసింది. హాకీ ఇండియా (హెచ్‌ఐ) వైఖరిని నిరసిస్తూ, బహిరంగంగానే వ్యాఖ్యలు చేసింది. హాకీ శిక్షణ శిబిరానికి ఎంపిక చేసిన ప్రాబబుల్స్‌లో రీతూకు చోటు కల్పించినప్పటికీ ఆమె సంతృప్తి చెందలేదు.

ముంబయి, సెప్టెంబర్ 20: దేశంలో క్రికెట్‌ను ఒక గాడిలో పెట్టడానికి, పాలనా వ్యవహారాలను పారదర్శంగా ఉంచడానికి సుప్రీం కోర్టు నియమించిన లోధా కమిటీ చేసిన సిఫార్సులను అమలు చేయాల్సిన సమయం ఆసన్నమవుతున్నప్పటికీ భారత క్రికెట్ నియంత్రణ బోర్డు (బిసిసిఐ) ఈ అంశంపై స్పష్టమైన వైఖరిని అనుసరించడంలేదు. సమస్యను దాటవేయడానికి ప్రయత్నిస్తున్నదని బుధవారం నాటి వార్షిక సర్వసభ్య సమావేశం (ఎజిఎం) అజెండా స్పష్టం చేస్తున్నది.

కాన్పూర్, సెప్టెంబర్ 20: అనారోగ్యంతో బాధపడుతున్న భారత ఫాస్ట్ బౌలర్ ఇశాంత్ శర్మ న్యూజిలాండ్‌తో జరిగే మొదటి టెస్టుకు అందుబాటులో ఉండడం లేదు. ఈ విషయాన్ని భారత జట్టు మేనేజ్‌మెంట్ ప్రకటించింది. అతను వైరల్ జ్వరంతో బాధపడుతున్నాడని తెలిపింది. విశ్రాంతి అవసరం కాబట్టి, మొదటి టెస్టులో అతను ఆడే అవకాశం లేదని పేర్కొంది. అయితే, ఇశాంత్‌కు రీప్లేస్‌మెంట్‌ను భారత కోచ్ అనీల్ కుంబ్లే కోరడం లేదు.