యాదగిరిగుట్ట రూరల్, అక్టోబర్ 30: హైదరాబాద్ -వరంగల్ జాతీయ రహదారి రక్తసిక్తమైంది. యాదగిరిగుట్ట మండలం బాహుపేట సమీపంలో సోమవారం ఘోర ప్రమాదం చోటుచేసుకుంది. ఆర్టీసీ బస్సు, ఆటో ఢీకొన్న ప్రమాదంలో ఐదుగురు అక్కడికక్కడే మృతి చెందారు. నలుగురి పరిస్థితి విషమంగా ఉంది. యాదాద్రి భువనగిరి జిల్లా యాదగిరిగుట్ట మండలంలోని బాహుపేట సమీపంలో ఆర్టీసీ వజ్ర బస్సు ఆటోను ఢీకొట్టింది.

హైదరాబాద్, అక్టోబర్ 30: పంచాయతీరాజ్ చట్టంలో సమూల మార్పులు తీసుకరావడానికి ప్రస్తుత శాసనసభ సమావేశాల్లోనే కొత్త చట్టం తీసుకవస్తామని ముఖ్యమంత్రి కె చంద్రశేఖర్‌రావు ప్రకటించారు. సామాజిక బాధ్యతను విస్మరించి పనితీరు బాగా లేని పంచాయతీలపై కఠిన చర్యలు తీసుకునే విధంగా చట్టంలో మార్పులు చేస్తామన్నారు. కొన్ని గ్రామ పంచాయతీలు కేంద్ర, రాష్ట్ర ప్రభుత్వ పథకాల పట్ల నిర్లక్ష్యం చేస్తున్నాయని ముఖ్యమంత్రి అన్నారు.

అమరావతి, అక్టోబర్ 30: ‘చేయూతనిచ్చే బాధ్యత నాది. అందిపుచ్చుకునే అవకాశం మీది’ అని ఆంధ్రప్రదేశ్ ముఖ్యమంత్రి చంద్రబాబు నాయుడు రాజధానికి భూములు ఇచ్చిన రైతులకు భరోసా ఇచ్చారు. సోమవారం అమరావతి సచివాలయ ప్రాంగణంలో ఆయన సింగపూర్ వెళుతున్న 34 మంది రైతులకు వీడ్కోలు పలికారు. సక్రమ మార్గంలో ముందుకు వెళితేనే ఎంతటి అభివృద్ధయినా సాధ్యమవుతుందని ఈ సందర్భంగా అన్నారు.

పెరవలి, అక్టోబర్ 30: అప్పుల బాధ తాళలేక ఇద్దరు పిల్లలు సహా భార్యాభర్తలు సామూహికంగా గోదావరిలో దూకి ఆత్మహత్యకు పాల్పడ్డారు. కుటుంబ సభ్యులు అదృశ్యమవ్వడం, నదివద్ద లభించిన వారి బైక్, చెప్పులు, ఆధార్ కార్డులు, ఆత్మహత్యకు పాల్పడుతున్నట్టు రాసిన లేఖ ఆధారంగా మాత్రమే వారు నదిలో దూకి ఆత్మహత్య చేసుకున్నారని భావిస్తున్నారు.