హైదరాబాద్, మే 16: తెలంగాణలో మస్తుగా చేపల అభివృద్ధికి అవసరమైన నిధులు పుష్కలంగా ఉన్నాయని నేషనల్ ఫిషరీష్ డెవలప్‌మెంట్ బోర్డు సిఈఓ రాణికుముదినిదేవి తెలిపారు. బుధవారం సచివాలయంలో మత్స్యశాఖ మంత్రి తలసాని శ్రీనివాస యాదవ్‌తో కలసి చేపల అభివృద్ధిపై చర్చించారు. చేపల అభివృద్ధికి తెలంగాణ ప్రభుత్వం చేస్తున్న కృషికి ఎన్‌ఎఫ్‌డిబి పూర్తి సహకారం అందిస్తుందని ఆమె భరోసా వ్యక్తం చేశారు.

హైదరాబాద్, మే 16: ప్రైవేటు పాఠశాలల బస్సులు ఊళ్లోకి వస్తే వాటి గాలి తీసేయాలని తాను పేర్కొనడం తప్పేనని, ఆ ప్రకటనలో ఎలాంటి దురుద్దేశం లేదని, కేవలం ప్రభుత్వ పాఠశాలలను ఆదరించాలన్న ఉద్దేశంతో మాత్రమే తాను అలా చెప్పానని ఉప ముఖ్యమంత్రి కడియం శ్రీహరి పేర్కొన్నారు. ప్రైవేటు విద్యాసంస్థలపై తనకెలాంటి వ్యతిరేక భావం లేదని అన్నారు. ప్రజలు ప్రభుత్వ పాఠశాలలను కాపాడుకోవాలనే ఉద్దేశంతో ఆ వ్యాఖ్య చేశానని చెప్పారు.

హైదరాబాద్, మే 16: హైదరాబాద్ నాంపల్లి ఎగ్జిబిషన్ గ్రౌండ్‌లో జూన్ 8న చేపమందు పంపిణీకి సంబంధించిన ఏర్పాట్లపై బుధవారం సచివాలయంలో రాష్ట్ర పశుసంవర్థక శాఖ మంత్రి తలసాని శ్రీనివాస యాదవ్ ఉన్నత స్థాయి సమావేశం నిర్వహించారు. సుదూర ప్రాంతాల నుంచి చేప మందుకోసం వస్తున్న ప్రజల సౌకర్యం కోసం అన్ని శాఖల అధికారులు సమన్వయంతో పని చేయాలని ఆయన సూచించారు.

హైదరాబాద్, మే 16: రైళ్లు, రైల్వే స్టేషన్లలో అధిక ధరలకు ఆహార పదార్ధాలను విక్రయిస్తున్న వారిపై కఠిన చర్యలు తీసుకుంటామని దక్షిణ మధ్య రైల్వే జనరల్ మేనేజర్ వినోద్‌కుమార్ యాదవ్ హెచ్చరించారు. క్యాటరింగ్ విభాగం పనితీరుతో పాటు భోజనం, అల్పాహారం, స్నాక్స్ ఇలా అన్నింటా నాణ్యత పాటించడంతో పాటు నిర్ణయించిన ధరలకు మాత్రమే విక్రయించాలి తప్ప అదనంగా విక్రయిస్తే కఠినంగా వ్యవహరిస్తామని హెచ్చరించారు.