నేను
ఆత్మను అక్షరంలోకి దింపుతానంటే
ఆత్మే అక్షయంగా కదలాడతానంది
అక్షర అక్షరాన్ని దున్నుకుంటూ పొమ్మంది
మట్టిపెళ్లల దాగిన మనిషి కథను చూడమంది
కథను చరిత్రగా మలచిన తీరు కనమంది
చరిత్ర కెక్కని శేషావతారాన్ని ఆత్మకథ చేయమంది
అవును
మానవ చరిత్రలో మనిషి కనిపిస్తుంటాడు
మరి మనిషి కథలో ఆత్మ మేల్కొంటుందా?
మనిషి తన కథ వినిపిస్తేనేగా ఆత్మ కదిలేది

నేను
మెలకువను -
కలలోను.. ఇలలోనూ!
దృశ్యంలోను.. అదృశ్యంలోనూ!
చీకటిలోను.. వెలుతురులోనూ!
ఉచ్ఛ్వాసలోను.. నిశ్వాసలోనూ!
నేను
నిద్రలోని మెలకువను -
సుడులు తిరుగుతు, తిరుగుతూ
ఉదయానికి జ్ఞానప్రసూన మవుతాను
ధ్యానగర్భ నవుతూ
అక్షరంగా ప్రసవిస్తాను
అ-క్షరంగా!
నేను-
అచేతనా చేతనను
- యోగ నిద్రను.
సమాధి స్పృహను

నేను-
బుద్ధి జీవిని.. బుధక్షేత్రాన్ని.
మానసికాన్ని.. మానస సంచారిని.
అతీత మానసాన్ని.. జ్ఞానత్రయాన్ని
నాలో
ఒక మెదడు
ఆ మెదడుకు కుడి ఎడమలు...
ఈ కుడి ఎడమలు ఏకం కావటమే యోగం.
ఈ జీవన యోగమే న్యూరాన్ ఫ్యూచర్.

నేను
దేహాన్ని! మనస్సును!!
వ్యక్తిని! వైయక్తికాన్ని!!
వ్యక్తిత్వాన్ని! వ్యక్తిమత్వాన్ని!!
అడుగులు నావే! అడుగుజాడలు నావే!!
నిర్ణయాలు నావే! ఫలితాలు నావే!!
సుఖమూ నేనే! శోకమూ నేనే!!
వ్యామోహమూ నేనే! వైరాగ్యమూ నేనే!!
మంచీ నాదే! చెడూ నాదే!!
స్పృహ నాదే! స్పందనా నాదే!!
నెగెటివిటీ నేనే! పాజిటివిటీ నేనే!