రావులపాలెం, డిసెంబర్ 5: భూసారాన్ని పెంపొందించుకునేందుకు రైతులు సేంద్రీయ ఎరువుల వాడకాన్ని అలవరచుకోవాలని ఎమ్మెల్సీ రెడ్డి సుబ్రహ్మణ్యం అన్నారు. ప్రపంచ నేల దినోత్సవం సందర్భంగా సోమవారం రావులపాలెం అరటి మార్కెట్ యార్డులో వ్యవసాయ శాఖ ఆధ్వర్యంలో నియోజకవర్గంలోని నాలుగు మండలాల రైతులకు అవగాహన సదస్సు నిర్వహించారు.

అత్తిలి, డిసెంబర్ 5 : అత్తిలిలో శ్రీవల్లీదేవసేన సమేత సుబ్రహ్మణ్యేశ్వర స్వామి షష్ఠి ఉత్సవాలు ఘనంగా నిర్వహించారు. స్వామివారి కళ్యాణం అనంతరం ఆదివారం రాత్రి నుంచే స్వామివారిని దర్శించుకోవడానికి భక్తులు బారులు తీరారు. అత్తిలి మాజీ ఎమ్మెల్యే చెరకువాడ శ్రీరంగనాథరాజు (రంగరాజు) స్వామివారిని దర్శించుకున్నారు. ఆలయ ప్రాంగణంలోని నాగేంద్రుని విగ్రహానికి భక్తులు పూజలు జరిపారు.

ద్వారకాతిరుమల, డిసెంబర్ 5: శ్రీవారికి భక్తులు సమర్పించే తలనీలాల టిక్కెట్ల రుసుము పెరగనుంది. ఇప్పటి వరకు రూ.10 ఉన్న టిక్కెట్టు రూ.15లకు పెంచేందుకు చిన వెంకన్న ట్రస్టు బోర్డు గతంలోనే నిర్ణయించగా రెండు రోజుల క్రితం రాష్ట్ర దేవాదాయ శాఖ కమిషనర్ వైవి అనూరాధ ఆమోద ముద్రవేశారు. దీంతో ప్రస్తుతం రూ.10లు ఉన్న పూర్తిక్షవరం, మూడు కత్తెరింపుల టిక్కెట్ల ధరలు రూ.15కు పెంచుతున్నారు.

తాడేపల్లిగూడెం, డిసెంబర్ 5: పంటలకు అధిక దిగుబడులు, ఆదాయం వచ్చేందుకు భూసారం పెంచుకోవలసిన ఆవశ్యకత ఎంతైనా ఉందని రాష్ట్ర దేవాదాయ, ధర్మాదాయ శాఖ మంత్రి పైడికొండల మాణిక్యాలరావు పేర్కొన్నారు. సోమవారం రూరల్ మండలం వెంకట్రామన్నగూడెం డాక్టర్ వైఎస్‌ఆర్ ఉద్యాన విశ్వవిద్యాలయంలోని కృషి విజ్ఞాన కేంద్రంలో ప్రపంచ నేలల దినోత్సవం, కిసాన్ సమ్మేళన్ కార్యక్రమం జరిగింది.