విజయనగరం, అక్టోబర్ 13: అంతర్‌జిల్లా నేరస్తుడు కొర్నాల పైడిరాజును పోలీసులు శనివారం అరెస్టు చేశారు. పట్టణంలో అనుమానాస్పదంగా సంచరించడంతో సిసిఎస్ డిఎస్పీ చక్రవర్తికి అందిన సమాచారం మేరకు వన్‌టౌన్ ఎస్సై, సిబ్బందితో కలసి రైల్వే స్టేషన్ సమీపంలో అరెస్టు చేశారు. నిందితుని నుంచి సుమారు రూ.1.50 లక్షల విలువైన బంగారు, వెండి వస్తువులను స్వాధీనపరచుకున్నారు.

ద్వారకాతిరుమల, అక్టోబర్ 13: శ్రీవారి క్షేత్రంలో గుండెపోటుకు గురైన ఒక గుర్తుతెలియని వృద్ధుడు శనివారం మృతిచెందాడు. సుమారు 70 ఏళ్ల వయసున్న ఈ వృద్ధుని ఆచూకీ తెలియరాలేదు. స్థానికుల కథనం ప్రకారం.. దాదాపు రెండు నెలల క్రితం క్షేత్రానికి వచ్చిన ఈ వృద్ధుడు ఆలయ పరిసరాల్లోనే సంచరిస్తుండేవాడు. అనివేణి మండపంలో పురోహితుడు పెట్టేది తింటూ బతికేవాడు.

అమలాపురం, అక్టోబర్ 13: నిషేధిత గుట్కా ప్యాకెట్ల విక్రయాలు జరుపుతున్న పాన్ షాపులపై అమలాపురం పట్టణ పోటీసులు శనివారం ఆకస్మిక తనిఖీలు నిర్వహించారు. ఈ సందర్భంగా ఏడు పాన్ షాపుల్లో గుట్కా విక్రయాలు సాగిస్తున్నట్టు గుర్తించి ఏడుగురు నిర్వాహకులను అదుపులోకి తీసుకున్నారు. ఆ షాపుల్లో నిల్వ ఉంచిన పదివేల గుట్కా ప్యాకెట్లను స్వాధీనం చేసుకున్నట్టు పట్టణ సీఐ సీహెచ్ శ్రీరామకోటేశ్వరరావు తెలిపారు.

కుప్పం, అక్టోబర్ 12: చిత్తూరు జిల్లా కుప్పం మండలంలోని దేవరాజపురంలో శుక్రవారం వైసీపీ జెండా ఆవిష్కరణను ఆ గ్రామ ప్రజలు అడ్డుకున్నారు. తమ గ్రామంలో పార్టీ జెండాను ఎలా ఆవిష్కరిస్తారంటూ టీడీపీ, వైసీపీ కార్యకర్తల నడుమ తోపులాటలు జరిగింది. చివరకు ఎలాగోలా పార్టీ జెండాను గ్రామంలో ఆవిష్కరించారు. తోపులాటలో గ్రామానికి చెందిన నలుగురు మహిళలు రమిల(60), మల్లమ్మ(50), సెల్వి(50), గాంధీయా(30)లకు గాయాలయ్యాయి.