ముంబయి, జూన్ 17: దాయాదులు ఇకపై ఒకరితో ఒకరు సొంత గడ్డపై తలపడే అవకాశాలే లేవని భారతీయ జనతా పార్టీ జాతీయ అధ్యక్షుడు అమిత్ షా సంచలన వ్యాఖ్యలు చేశారు. ఆదివారం ఇంగ్లండ్‌లో జరగనున్న చాంపియన్స్ ట్రోఫీ ఫైనల్స్‌కు ముందు ఆయన ఈ వ్యాఖ్యలు చేయడం అత్యంత ప్రాధాన్యతను సంతరించుకున్నాయి. పార్టీ బలోపేతానికి గాను మూడు రోజుల పర్యటనలో భాగంగా శనివారం ఇక్కడకు వచ్చిన సందర్భంగా ఆయన విలేఖరులతో మాట్లాడారు.

న్యూఢిల్లీ, జూన్ 17: కార్మికుల ఉపాధికి కనీస వయో పరిమితి, బాల కార్మిక వ్యవస్థ నిర్మూలనకు సంబంధించి అంతర్జాతీయ కార్మిక సంఘం రూపొందించిన రెండు తీర్మానాలను భారతదేశం ఆమోదించిందని కేంద్ర కార్మిక శాఖ మంత్రి బండారు దత్తాత్రేయ ప్రకటించారు. అంతర్జాతీయ కార్మిక సంఘం సదస్సుకు హాజరై వచ్చిన అనంతరం ఆయన శనివారం విలేఖరుల సమావేశంలో మాట్లాడారు.

న్యూఢిల్లీ, జూన్ 17: ఆర్‌జెడి అధినేత లాలూ ప్రసాద్ యాదవ్ కుమారుడు, బీహార్ మంత్రి తేజ్ ప్రతాప్ యాదవ్‌కు కేటాయించిన పెట్రోలు బంకు లైసెన్స్‌ను బిపిసిఎల్ రద్దు చేసింది. ఇందుకు సంబంధించిన నియమ నిబంధనలను ఉల్లంఘించినందుకే ఈ చర్య తీసుకున్నామని వెల్లడించింది. అయితే బిపిసిఎల్ చర్యను నిలిపివేస్తూ కోర్టు మధ్యంతర ఉత్తర్వులు జారీ చేసినట్టుగా ఆర్‌జెడి వర్గాలు వెల్లడించాయి.

వదోదర, జూన్ 17: దేశంలో రైతుల ఆదాయం రెట్టింపు చేయడానికి కేంద్రం కార్యచరణ రూపొందిస్తున్నట్టు మంత్రి ప్రకాశ్ జవడేకర్ వెల్లడించారు. ప్రధాని నరేంద్ర మోదీ నాయకత్వంలోని ప్రభుత్వం రైతుల ఆదాయం ఐదేళ్లలో రెట్టింపుచేయాలని లక్ష్యంగా పనిచేస్తున్నట్టు శనివారం ఇక్కడ స్పష్టం చేశారు. 2022 నాటికి లక్ష్యాన్ని చేరుకోడానికి వీలుగా ఏడు అంశాల కార్యక్రమాన్ని అమలుచేయనున్నట్టు జవడేకర్ ప్రకటించారు.