న్యూఢిల్లీ, ఆగస్టు 9: దేశ సార్వభౌమాధికారం, సమగ్రత, సమైక్యతకోసం పునరంకితం కావాలని పార్లమెంటు ప్రకటించింది. క్విట్ ఇండియా దినోత్సవం సందర్భంగా దేశంకోసం అశువులుబాసిన సమరయోధులకు మంగళవారం పార్లమెంటు ఘన నివాళులర్పించింది. జాతిపిత మహాత్మాగాంధీ, స్వాతంత్య్ర సమరయోధులకు సభ ఘనంగా అంజలి ఘటించింది. దేశ చరిత్రలో ఈ రోజు చిరస్మరణీయమని రాజ్యసభ చైర్మన్ హమీద్ అన్సారీ స్పష్టం చేశారు.

ఇంఫాల్, ఆగస్టు 9: సైనిక దళాల ప్రత్యేక అధికారాల చట్టాన్ని (ఆఫ్‌స్పా) రద్దు చేయాలంటూ పదహారేళ్ల పాటు అవిశ్రాంతంగా నిరాహార దీక్ష చేసిన మణిపూర్ ఉక్కు మహిళ ఇరోమ్ షర్మిళ మంగళవారం తన దీక్షను విరమించారు. ఈ సందర్భంగా భావోద్వేగానికి గురైన ఇరోమ్ కన్నీటి పర్యంతమయ్యారు. ఇంఫాల్‌లోని ప్రభుత్వ ఆసుపత్రి వద్ద జైలుగా మార్చిన ఓ గదిలో అరచేతిలోని తేనెను స్వీకరించి దీక్ష విరమించారు.

న్యూఢిల్లీ, ఆగస్టు 9: విభజన హామీలు అమలు చేయాలని కోరుతూ చిత్తూరు ఎంపీ శివప్రసాద్ ఢిల్లీలో వినూత్న నిరసనకు దిగారు. మంగళవారం పార్లమెంట్ ఆవరణలో తప్పెటగుళ్లు కళాకారుడి వేషధారణలో నిరసన తెలిపారు. ప్రత్యేక హోదాతో సహా విభజన హామీలు నెరవేర్చాలని పాటద్వారా ప్రధాని నరేంద్ర మోదీకి విజ్ఞప్తి చేశారు. అనంతరం విలేఖరులతో మాట్లాడుతూ ఏపికి కేంద్రం అన్యాయం చేయొద్దని కోరారు.

న్యూఢిల్లీ, ఆగస్టు 9:గోసంరక్షణ పేరుతో దాడులు జరిపే వారిపై కఠిన చర్యలు తీసుకోవాలని అన్ని రాష్ట్రాలు, కేంద్ర పాలిత ప్రాంతాలను కేంద్ర ప్రభుత్వం ఆదేశించింది. బూటకపు గో సంరక్షకులను శిక్షించాలని రెండు రోజుల క్రితం ప్రధాని నరేంద్ర మోదీ ఆదేశించిన నేపథ్యంలో కేంద్ర హోం మంత్రిత్వ శాఖ ఇందుకు సంబంధించిన మార్గదర్శకాలు జారీ చేసింది.