కడప(కల్చరల్), జూలై 28:స్వస్తిశ్రీ దుర్మిఖినామ సంవత్సర ఆశాఢ బహుళ నవమి పురస్కరించుకుని గురువారం నగరంలోని పలు సుబ్రహ్మణ్యేశ్వరస్వామి ఆలయాల్లో శ్రీవల్లీదేవసేన సమేత స్వామివారికి ఆడికృత్తిక మహోత్సవం వైభవంగా జరిగింది. ఈసందర్భంగా స్వామివారిని ప్రత్యేకంగా అలంకరించారు. ఉదయం నుంచి భక్తులు వారి సమీపంలోని సుబ్రమణ్యేశ్వరస్వామి ఆలయాలకు పెద్ద సంఖ్యలో తరలివచ్చి స్వామిని దర్శించుకుని పూజల్లో పాల్గొన్నారు.

ఖాజీపేట, జూలై 28:శ్రీశైల జలాశయంలో నీటిని స్థిరీకరించాలని కోరుతూ బస్టాండు కూడలిలో గురువారం రైతు నాయకులు ధర్నా చేపట్టారు. ధర్నా అనంతరం వారు మాట్లాడుతూ రాయలసీమకు నీరు వచ్చేందుకు 854 అడుగుల సామర్థ్యం డ్యామ్‌లో ఉంటేనే విడుదల చేస్తామని చెబుతున్న నేతలు ఆ సామర్థ్యాన్ని స్థిరీకరించాలని కోరారు. 854 అడుగులు స్థిరీకరించకుండా నాగార్జునసాగర్‌కు ఎలా వదులుతున్నారని ప్రశ్నించారు.

సుండుపల్లె, జూలై 28:మండల కేంద్రమైన సుండుపల్లె సమీపంలోని అగ్రహారంలో నివాసం ఉంటున్న నూరుల్లా(60) బతుకుదెరువు కోసం కువైట్‌కు రహదారిపై బస్టాండు సమీపంలో కాలుజారి కింద పడి గత మూడు రోజుల నుండి ఆసుపత్రి కోమాలో ఉండి బుధవారం మృతిచెందినట్లు తమకు సమాచారం వచ్చిందని కుటుంబీకులు తెలిపారు. ఈ విషయం తెలియగానే కుటుంబంలో విషాదం నెలకొంది. నూరుల్లా భార్యా బిడ్డలు భోరుమని విలపిస్తున్నారు.

గాలివీడు, జూలై 28:మండలంలోని గాలివీడు గ్రామం దానంరెడ్డిగారిపల్లెకు చెందిన చిన్నసింగం పద్మావతమ్మ అదృశ్యంపై కేసు నమోదు చేసినట్లు ఏఎస్‌ఐ రెడ్డయ్య తెలిపారు. భర్త వెంకటరమణారెడ్డి ఫిర్యాదు మేరకు మహిళ అదృశ్యంపై కేసు నమోదు చేశామన్నారు. ఏడాది వయసు కలిగిన కుమారున్ని తన వెంట తీసుకెళ్లిందన్నారు. ఈ సమాచారం తెలిసిన వారు లక్కిరెడ్డిపల్లె సీఐ, స్థానిక పోలీస్‌స్టేషన్లకు ఫోన్ చేయాల్సిందిగా సూచించారు.