ఇస్లామాబాద్, డిసెంబర్ 8: ద్వైపాక్షిక చర్చల విషయంలో భారత్ లెక్కలేనితనంతో వ్యవహరిస్తోందని పాకిస్తాన్ ఆరోపించింది. కాశ్మీర్ సమస్యకు ఫలవంతమైన పరిష్కారాన్ని సూచించే విధంగా చర్చలు జరిపేందుకు భారత్ ఏ మాత్రం చొరవ చూపించటం లేదని పాకిస్తాన్ విదేశాంగ శాఖ ప్రతినిధి నఫీజ్ జకారియా గురువారం ఆరోపించారు. కాశ్మీర్ వివాదం పరిష్కారంలో అంతర్జాతీయ సమాజం కీలకపాత్ర పోషించాలని ఆయన విజ్ఞప్తి చేశారు.

న్యూఢిల్లీ, డిసెంబర్ 8: పదిహేను కొత్త కులాలను కేంద్ర ఓబిసి జాబితాలో చేర్చనున్నారు. దీనికి సంబంధించి కేంద్రం నోటిఫికేషన్ జారీ అయింది. జాతీయ వెనుకబడిన కులాల కమిషన్ (ఎన్‌సిబిసి) 8 రాష్ట్రాలకు సంబంధించి 28 మార్పులు చేయాల్సిందిగా సిఫార్సు చేసింది. అస్సాం, బిహార్, హిమాచల్‌ప్రదేశ్, జార్ఖండ్, మహారాష్ట్ర, మధ్యప్రదేశ్, జమ్మూకాశ్మీర్‌లకు స్థానం కల్పించారు.

న్యూఢిల్లీ, డిసెంబర్ 8: దేశంలోని రైల్వే స్టేషన్లు, బస్సులు, మెట్రో స్టేషన్లలో పాత 500నోట్లు ఇక చెల్లవు. 10వ తేదీ తరువాత పాత 500 రూపాయల నోట్లను తీసుకోరని ప్రభుత్వం వర్గాలు గురువారం వెల్లడించాయి. ఇంతకు ముందు రైల్వే కౌంటర్లు, ప్రభుత్వం రంగ బస్సు టికెట్లకు డిసెంబర్ 15 వరకూ అనుమతిస్తారని తెలిపారు. ఇప్పుడు దాన్ని డిసెంబర్ 10వరకు కుదించారు.

గుంటూరు, డిసెంబర్ 8: గుంటూరు అర్బన్ పరిధిలోని సబ్ డివిజన్ల అధికారిక ప్రాంతపు హద్దుల్లో మార్పులు చేర్పులు అంశంపై అర్బన్ ఎస్‌పి సర్వశ్రేష్ఠ త్రిపాఠి దృష్టి సారించారు. ఈ మేరకు గురువారం అర్బన్ జిల్లా పోలీసు కార్యాలయంలో ఎస్‌పి త్రిపాఠి అధికారులతో సమీక్ష నిర్వహించారు. ప్రస్తుతమున్న సబ్ డివిజన్లలోని పోలీసుస్టేషన్ల సంఖ్య, గ్రామాలు, ప్రజల సంఖ్య, విస్తీర్ణం, సిబ్బంది పనిభారం తదితర విషయాలపై ఆరా తీశారు.