న్యూఢిల్లీ, మే 18: కేంద్రం నిధుల కేటాయింపు, పంపకం, ఇతర విషయాల్లో ఏ రాష్ట్రానికి అన్యాయం జరగదని, ఇందులో ఉత్తర, దక్షిణ రాష్ట్రాల వివక్ష ఎంతమాత్రం లేదని 15వ ఆర్థిక సంఘం స్పష్టం చేసింది. నిధులు, ఇతర కేటాయింపుల్లో ఉత్తర రాష్ట్రాలకు ఒక విధంగా, దక్షిణ రాష్ట్రాలకు ఒకవిధంగా చేస్తూ వివక్ష చూపిస్తున్నారని వచ్చిన ఆరోపణలను కమిషన్ ఖండించింది.

ముంబయి, మే 18: అనైతిక విధానాలతో అధికారం చేజిక్కించుకోవడం బీజేపీ కొత్త పాలసీ అని శివసేన తీవ్రంగా ఆరోపించింది. కర్నాటకలో జరుగుతున్న పరిణామాలపై ఆ పార్టీ మాట్లాడుతూ బీజేపీ ప్రభుత్వం ఒక్కో రాష్ట్రానికి ఒక్కో రూల్‌ను ఎలా అవలంబిస్తోందని ప్రశ్నించారు.

న్యూఢిల్లీ, మే 18: కర్నాటక అసెంబ్లీలో బీజేపీ బలపరీక్షకు సుప్రీం కోర్టు ఆదేశించటం చారిత్రాత్మకమని జెడీ(ఎస్), సీపీఐ నేతలు వ్యాఖ్యానించారు. నేడు జరగబోయే బలపరీక్షలో బీజేపీ ఎట్టి పరిస్థితుల్లోనూ విజయం సాధించే అవకాశం లేదని జోస్యం చెప్పారు. జేడీ(ఎస్)నేత దానిష్ అలీ మీడియాతో మాట్లాడుతూ 24 గంటల క్రితం ముఖ్యమంత్రిగా ప్రమాణ స్వీకారం చేసిన యెడ్యూరప్ప, నేటితో దిగిపోతారని జోస్యం చెప్పారు.

న్యూఢిల్లీ, మే 18: గ్రామీణ ప్రాంతాల్లో వైద్యసేవలు అందుబాటులో లేవంటూ ఉపరాష్టప్రతి వెంకయ్యనాయుడు ఆవేదన వ్యక్తంచేశారు. ఈ దుస్థితినుంచి గ్రామీణ భారతానికి విముక్తి కలిగించేందుకు ప్రభుత్వం చేస్తున్న కృషికి, ప్రైవేటు రంగం ఉదారంగా తనవంతు సహాయం అందించాలని ఆయన పిలుపునిచ్చారు. ఎంబీబీఎస్ డాక్టర్లు, తొలి ప్రమోషన్ పొందేవరకు గ్రామీణ ప్రాంతాల్లో పనిచేయడం తప్పనిసరి చేయాలన్నారు.