హైదరాబాద్: ప్రజలందరూ ప్రశాంతంగా పండుగలు జరుపుకోవాలని, పుకార్లు నమ్మవద్దని, సోషల్ మీడియాలో, ఇతర మాధ్యామాల ద్వారా పుకార్లకు పాల్పడితే కఠిన చర్యలు తీసుకుంటామని నగర పోలీస్ కమిషనర్ మహేందర్‌రెడ్డి హెచ్చరించారు. గణేశ్ నిమజ్జనం, బక్రీద్ నేపథ్యంలో నగరంలో పోలీసులు భారీ బందోబస్తు ఏర్పాటు చేశారు. నగరంలోని పలు ప్రాంతాల్లో పోలీసులు సోమవారం కవాతు నిర్వహించారు. సీసీ కెమెరాలతో పర్యవేక్షణ చేపట్టారు.

హైదరాబాద్‌: భారీ వర్షాలు కురిసే అవకాశం ఉందన్న నివేదికల నేపథ్యంలో అవసరమైన ముందుజాగ్రత్తలు తీసుకోవాలని అధికారులను తెలంగాణ ముఖ్యమంత్రి కేసీఆర్‌ సోమవారం ఆదేశించారు. జీహెచ్‌ఎంసీ కమిషనర్‌ జనార్దన్‌రెడ్డి, సీపీ మహేందర్‌రెడ్డితో ఫోన్లో మాట్లాడిన కేసీఆర్‌ హైదరాబాద్‌లో అవసరమైన చర్యలు తీసుకోవాలన్నారు.

హైదరాబాద్ : శంషాబాద్ విమానాశ్రయం నుంచి సోమవారం ఉదయం కువైట్ వెళ్తున్న ముషీర్ అహ్మద్ అనే వ్యక్తిని ఎయిర్‌పోర్ట్ పోలీసులు తనిఖీ చేయగా బుల్లెట్‌ బయటపడింది. ముషీర్ అహ్మద్ ని అదుపులోకి తీసుకున్నారు. పాతబస్తీ తలాబ్‌కట్టకు చెందిన వ్యక్తిగా ముషీర్ అహ్మద్ని పోలీసులు గుర్తించారు.

హైదరాబాద్‌ : వినాయకుడి నిమజ్జనం కోసం చెరువులోకి దిగిన వ్యక్తి ప్రాణాలు కోల్పోయిన సంఘటన కూకట్‌పల్లి పరిధిలో జరిగింది. జగద్గిరిగుట్టకు చెందిన భాస్కర్‌ (42) ఆదివారం రాత్రి మిత్రులతో కలిసి కూకట్‌పల్లి నల్లచెరువుకు వినాయక నిమజ్జనం కోసం వచ్చి విగ్రహం సహా చెరువులోకి దిగి చెరువులో మునిగిపోయాడు. సోమవారం ఉదయం అతని మృతదేహం లభించింది.