విజయవాడ, మార్చి 24: వివిధ పంచాయితీల కాలపరిమితి ముగిశాకే, విజయవాడ మున్సిపల్ కార్పొరేషన్ (వీఎంసీ)లో విలీనం ప్రక్రియ చేపడతామని రాష్ట్ర పురపాలక శాఖ మంత్రి నారాయణ వెల్లడించారు. రాష్ట్ర శాసన మండలిలో శనివారం జరిగిన ప్రశ్నోత్తరాల సమయంలో రాజేంద్ర ప్రసాద్ అడిగిన ప్రశ్నకు మంత్రి బదులిస్తూ, వీఎంసీలో 51 గ్రామాలను విలీనం చేసేందుకు ప్రతిపాదించామన్నారు.

విజయవాడ, మార్చి 24: శ్రీరామ నవమి సందర్భంగా ఈ నెల 26న అసెంబ్లీ, శాసనమండలికి కూడా రాష్ట్ర ప్రభుత్వం సెలవు ప్రకటించింది. ముందుగా ఆదివారం సెలవు ప్రకటించినప్పటికీ, ఆ తరువాత దానిని సోమవారానికి మార్చింది. అసెంబ్లీ, శాసన మండలి కార్యకలాపాలకు సెలవు ప్రకటించడంపై శనివారం మధ్యాహ్నం వరకూ స్పష్టత లేదు. సాయంత్రం ఈ మేరకు అసెంబ్లీ సెక్రటరీ విజయరాజు సెలవు ప్రకటిస్తూ, గందరగోళానికి తెరదించారు.

అమరావతి, మార్చి 24: తనను ఎమ్మెల్సీ పదవికి రాజీనామా చేయాలని డిమాండ్ చేస్తున్న టీడీపీ నేతలు ముందు, తమ పార్టీ కార్యకర్తలు, మోదీ అభిమానులు, బీజేపీ సానుభూతిపరుల వల్ల గెలిచి అధికారంలోకి వచ్చిన సీఎం చంద్రబాబునాయుడుతో రాజీనామా చేయించాలని బీజేపీ ఎమ్మెల్సీ సోము వీర్రాజు సూచించారు. గత ఎన్నికల్లో మా ఓట్లు కూడా టీడీపీకి పోలయినందువల్లే టీడీపీ గెలిచిన విషయాన్ని గుర్తుంచుకోవాలని ఘాటుగా విమర్శించారు.

నరసరావుపేట, మార్చి 24: గత నాలుగేళ్ల తెలుగుదేశం పార్టీ పాలనలో సమాజంలోని ఏ వర్గమైనా సంతృప్తిగా ఉందా అని ప్రతిపక్షనేత వైఎస్ జగన్మోహన్‌రెడ్డి ప్రశ్నించారు.